شمالی غزہ میں فلسطینیوں کے ‘‘حق واپسی’’ مظاہرے پر اسرائیلی فائرنگ، ایک شہید، 65 زخمی
[ 15/05/2011 - 10:41 AM ]
بیت حانون ۔۔۔ مرکز اطلاعات فلسطین

شمالی غزہ کی مقبوضہ فلسطین میں ہزاروں افراد نے احتجاجی مظاہرہ نکالا، بیت حانون (ایریز) کراسنگ کے قریب سے گزرنے والی اس ریلی پر اسرائیلی فوج نے ٹینک اور مشین گن سے فائرنگ کرکے ایک فلسطینی کو شہید جبکہ 65 کو زخمی کردیا ہے۔

فلسطینی میڈیکل سروسز کے میڈیا کوآرڈینیٹر ادھم ابو سلمیہ نے ‘‘مرکز اطلاعات فلسطین’’ کے نمائندے کو بتایا کہ اسرائیلی فوج کی اس اندھا دھند فائرنگ سے زخمی ہونے والوں کی تعداد 65 ہوگئی ہے جن میں سے اکثر اٹھارہ سال سے کم عمر ہیں۔

ہمارے نمائندے کی اطلاعات کے مطابق اسرائیلی جارحیت کے فورا بعد فلسطینی ایمبولینسیں جائے وقوعہ کی جانب دوڑ پڑیں اور زخمیوں کو ہسپتال منتقل کرنے کا عمل شروع کردیا گیا۔

غزہ کی تمام اسلامی اور قومی جماعتوں کی کال پر اس مظاہرے میں لاکھوں افراد شریک تھے جنہوں نے فلسطینی علم اور فلسطینی پناہ گزینوں کی واپسی کی علامتی چابیاں اٹھا رکھی تھیں۔ مظاہرین کا مطالبہ تھا کہ 15 مئی 1948ء کے روز فلسطین پر اسرائیلی تسلط کے نتیجے میں دیگر ممالک کی جانب زبردستی ہجرت پر مجبور کیے گئے فلسطینیوں کو وطن واپس لایا جائے۔

اس مظاہرے میں اٹلی کے درجنوں رضا کاروں نے بھی شرکت کی۔ واضح رہے کہ گزشتہ کچھ عرصے سے اطالوی رضا کار اسرائیلی دہشت گردی کے خلاف فلسطینیوں کے ساتھ اظہار یک جہتی میں بھرپور حصہ لے رہے ہیں اور غالبا اہل غزہ کی اسی حمایت کی پاداش میں گزشتہ ماہ ایک اطالوی رضا کار کو غزہ میں موت کی نیند سلا دیا گیا تھا۔

__________________

اندازِ بیاں گرچہ بہت شوخ نہیں ہے
شاید کہ اتر جائے ترے دل میں مری بات