جنین(اے این این)اسرائیلی فوج نے جنین میں تحریک جہاد اسلامی کے رہنما شیخ بسام السعدی، جنہیں دو ماہ قبل رہا کیا گیا تھا، کو گرفتار کرلیا ہے۔ جمعہ کے روز ہی دیگر کارروائیوں میں مغربی جنین سے مزید چار فلسطینی بھی اغوا کیے گئے ہیں۔ عینی شاہدین نے بتایا کہ جنین کیمپ میں علی الصبح اسرائیلی فوج کی بڑی تعداد نے ایک کارروائی کی جس میں صہیونی فوج کے خاص یونٹ نے شرکت کی، دوران کارروائی فائرنگ اور آواز پیدا کرنے والے بموں کا استعمال بھی کیا گیا۔ مقامی افراد نے بتایا کہ فوجی اہلکاروں نے کیمپ میں موجود 49 سالیہ شیخ بسام سعدی کے گھر کا محاصرہ کر کے انہیں گرفتار کیا، کئی فوجی گھر کی تلاشی لیتے رہے۔مرکز اطلاعات فلسطین کے مطابق شیخ بسام کے گھر پر دھاوے پر حملے سے قبل فوجی اہلکار کیمپ کی شاہراہ پر گشت کرتے رہے اور گرفتاری کے بعد انہیں نامعلوم مقام کی جانب منتقل کردیا گیا ہے۔ دوسری جانب درجنوں اسرائیلی فوجی گاڑیوں نے مغربی جنین کے علاقے السیلہ الحارثیہ میں تحریک جہاد اسلامی کے کارکنوں کے گھروں پر دھاوا بولا اور چار افراد کو گرفتار کرلیا۔ مقامی ذرائع کے مطابق صہیونی فوج نے علاقے میں کئی گھروں کا گھیرا کرلیا اور مخصوص جگہوں پر قبضہ کرکے گھروں کی تلاشی شروع کی اور اس دوران 25 سالہ منتصر احمد جرادات، 23 سالہ حسین احمد جرادات، 38 سالہ حسین رفیق جرادات اور 25 سالہ حسن مصطفی جرادات نامی شہریوں کو حراست میں لیے لیا۔

__________________

اندازِ بیاں گرچہ بہت شوخ نہیں ہے
شاید کہ اتر جائے ترے دل میں مری بات