اسلام آباد( جنگ نیوز) جیو ٹی وی کی بندش اور میڈیا پر پابندیوں کے خلاف پاکستان فیڈرل یونین آف جرنلسٹس کی کال پر ملک گیر احتجاجی تحریک کے سترہویں روز راولپنڈی اسلام آباد پریس کلب اسلام آباد کیمپس کے سامنے آرآئی یو جے کے زیر اہتمام احتجاجی کیمپ لگایا گیا کیمپ میں بڑی تعداد میں وکلاء  سول سوسائٹی ممبران سیاسی کارکن طلباء اور عام شہریوں نے شرکت کرکے جیو اور میڈیا کے ساتھ اظہار یکجہتی کیا۔ کیمپ میں شرکت کرنے والوں میں صدر آر آئی یو جے افضل بٹ  سینئر صحافی حافظ بشیر احمد اعوان  رہنما پی ایف یو جے ناصر زیدی  حامد میر  جوائنٹ سیکرٹری راولپنڈی بار کونسل شہباز راجپوت  سینئر وکلاء شیخ سلیمان ایڈووکیٹ اطہر من اللہ ایڈووکیٹ  تسلیم عباسی ایڈووکیٹ  وکلاء نواز کے چیئرمین اظہر میر  سول سوسائٹی کے سرور باری سینئر نائب صدر پریس کلب جمیل مرزا  جوائنٹ سیکرٹری آر آئی یو جے وقار ستی  سابق وفاقی وزیر جے سالک شامل تھے۔ صدر آر آئی یو جے افضل بٹ نے احتجاجی کیمپ سے خطاب کرتے ہوئے کہا کہ ملک میں ایمرجنسی کے نام صحافت اور عدلیہ پر مارشل لاء نافذ کیا گیا ہے۔ پی سی او کے تحت میڈیا مالکان اور اینکر پرسنز و سینئر صحافیوں سے کالے قوانین پر دستخط لے کر زبان بندی اور آزادی صحافت سلب کرنے کی ناپاک کوششیں کی جا رہی ہیں۔ انہوں نے کہا کہ ہم وطن عزیز کو پیچھے دھکیلنے کی سازش کامیاب نہ ہونے دیں گے۔ سینئر صحافی ناصر زیدی نے خطاب کرتے ہوئے کہا کہ پی ایف یو جے نے صحافیوں اور ان کے روزگار کے تحفظ اور آزادی صحافت کیلئے درخشندہ اور لازوال تاریخ رقم کی ہے۔ صحافیوں کو جدوجہد جاری رکھنے پر سلام پیش کرتا ہوں ہم جلد کامیابی حاصل کریں گے۔سینئر صحافی منیر خواجہ  سردار ممتاز اور نسیم شہباز راجپوت ایڈووکیٹ نے نظمیں پیش کیں۔ صحافیوں اور سول سوسائٹی کے اراکین نے آزادی صحافت کی بحالی کیلئے زبردست نعرے بازی کی۔

__________________