لاہور (نمائندہ جنگ) جنرل پرویز مشرف نے صدارتی حکم کے تحت اسلام آباد کے لیے نئی ہائیکورٹ قائم کردی ہے جسے اسلام آباد ہائیکورٹ کا نام دیا گیا ہے۔ اسلام آباد ہائیکورٹ چیف جسٹس اور 9ججوں پر مشتمل ہو گی اور ججوں کی تمام تقرریاں اور شرائط ملازمت 1973ء کے آئین کے تحت صوبائی ہائی کورٹس کے ججوں کی طرح ہی ہوں گی۔ اٹارنی جنرل پاکستان جسٹس (ر) ملک محمد قیوم نے جنگ کو بتایا کہ وفاقی دارالحکومت اسلام آباد،صوبہ پنجاب کا حصہ نہیں ہے ،بھارت سمیت دنیا کے کئی ممالک میں دارالحکومت کی الگ عدالت ہوتی ہے۔ انہوں نے کہا کہ وفاقی دارالحکومت کی الگ ہائیکورٹ کے قیام کا مطالبہ اور منصوبہ بڑا پرانا تھا جس پر اب عمل درآمد کیا گیا ہے اور صدر مملکت نے صدارتی حکم جاری کر دیا ہے۔ انہوں نے کہا کہ اسلام آباد ہائیکورٹ کا دائرہ اختیار صرف اسلام آباد تک ہو گا جبکہ لاہور ہائیکورٹ کا راولپنڈی بنچ بھی برقراررہے گا۔

__________________