اسلام آباد......سپریم کورٹ نے اسلام آباد میں ہائی کورٹ کے قیام کے خلاف لاہور ہائی کورٹ کا حکم امتناعی معطل کردیا ہے ۔ لاہور کی عدالت عالیہ میں دائر اس مقدمہ کی سماعت بھی سپریم کورٹ میں کیے جانے کا فیصلہ سنایا گیا ہے۔ سپریم کورٹ کے چیف جسٹس عبدالحمید ڈوگر کی سربراہی میں چار رکنی بنچ نے آج حکومتی اپیل کی سماعت کی۔ سماعت کے دوران اٹارنی جنرل ملک قیوم نے دلائل دیتے ہوئے کہا کہ اس معاملے میں لاہور ہائی کورٹ فریق بن چکی ہے اس لیے سماعت سپریم کورٹ میں ہونی چاہئے ۔ سپریم کورٹ نے اپنے حکم میں کہا ہے کہ وفاقی ہائی کورٹ کے حوالے سے لاہور ہائی کورٹ میں جو مقدمہ زیر سماعت ہے ، وہ عدالت عظمیٰ کو منتقل کیا جائے ۔ عدالت نے مزید سماعت8 جنوری تک ملتوی کرنے کا اعلان بھی کیا ۔