اسٹاک مارکیٹ: انتخابی نتائج کا مثبت ردعمل، 444پوائنٹس کا اضافہ
کراچی(اسٹاف رپورٹر) عام انتخابات کے نتائج پر اسٹاک مارکیٹوں کی جانب سے ردّعمل زبردست طورپرمثبت رہا اور تیزی کی ایک جاندار لہرمنگل کو دیکھنے میں آئی۔کے ایس ای انڈکس میں444 پوائنٹس کے اضافے سے 15000کی نفسیاتی حد عبور ہونے کے امکانات بڑھ گئے اور انڈکس گزشتہ تمام ریکارڈ توڑتے ہوئے 14823 تک پہنچ گیا تاہم بعد میں یہ سطح برقرار نہ رہ سکی جس کی وجہ منافع کا حصول اور ٹریکشن کا دباؤ تھا۔ منگل کی سب اہم بات کاروباری سرگرمی اور تجارتی حجم کا بڑھنا تھاجو400 ملین حصص کے سودوں کے قریب رہا۔ دوسر ی جانب کاروباری حلقوں اورسرمایہ کاروں نے عام انتخابات کا خیر مقدم کرتے ہوئے کہا ہے کہ انتخابات کے پرامن انعقاد اور اس کے شفاف نتائج سے طویل عرصے سے جاری سیاسی بے یقینی ختم ہوگئی ہے اور انہیں توقع ہے کہ جلد حکومت سازی بھی احسن طریقے سے مکمل ہوجائے گی۔ غیر ملکی سرمایہ کاروں نے بھی موجودہ سیاسی صورتحال پر اطمینان کا اظہار کیا اور بڑے پیمانے پرحصص کی خریداری کی۔ لاہور میں 191 پوائنٹس بڑھے۔

__________________