کراچی …اسٹیٹ بینک کی جانب سے لیے گئے اقدامات اور منی مارکیٹ میں سٹہ بازی کرنے والوں کے خلاف تحقیقات کی خبروں کے بعد آج انٹربینک مارکیٹ میں ڈالر کے مقابلے میں روپے کی قدر میں ریکوری دیکھی جارہی ہے۔ فاریکس مارکیٹ ڈیلرز کے مطابق، پچھلے دو روز سے روپے کی مسلسل گرتی قدر کے بعد آج روپے کی قدر میں ریکوری دیکھی جارہی ہے، اور ڈالر ایک روپے چالیس پیسے کمی کے بعد82 روپے50 پیسے پر ٹریڈ ہورہا ہے۔ ڈیلرز کے مطابق، مارکیٹ میں مرکزی بینک کی مداخلت کے امکان کو رد نہیں کیا جاسکتا۔ڈیلرز کے مطابق، مرکزی بینک کی جانب سے ایک بار پھر غیرملکی کرنسی اکاؤنٹس منجمد نہ کرنے کے اعلان اور منی مارکیٹ میں سٹہ بازی کرنے والوں کے خلاف تحقیقات کی خبروں کے باعث بھی آج ڈالر کی مانگ میں کمی دیکھی جارہی ہے۔ جب کہ صدر زرداری کے دورہ چین کے بعد چین سے نئی سرمایہ کاری آنے کی توقعات بھی روپے کی قدر میں ریکوری کی وجہ ہوسکتی ہے۔