برطانوی پولیس نے کہا ہے کہ پاکستان کی سابق وزیر اعظم بے نظیر بھٹو کی ہلاکت دھماکے کی شدت سے ہوئی نہ کہ گولی سے۔

اسکاٹ لینڈ یارڈ کی ٹیم نے وزارت داخلہ کو سابق وزیراعظم بینظیر بھٹو قتل کیس کی رپورٹ پیش کردی ہے۔

امریکی اخبار نیویارک ٹائمز نے سکاٹ لینڈ یارڈ کی تحقیقاتی ٹیم کی رپورٹ کے حوالے سے دعویٰ کیاہے کہ بے نظیر بھٹو کی موت گولی لگنے سے نہیں ہوئی ۔ نیویارک ٹائمز میں شائع ہونے والی رپورٹ میں کہاگیاہے کہ سکاٹ لینڈ یارڈ کی تحقیقاتی رپورٹ میں کہا گیاہے کہ بے نظیر بھٹو کی موت گولی لگنے سے نہیں ہوئی بلکہ دھماکے کی شدت سے ان کا سرکسی چیز سے ٹکرایا اور اس کے نتیجے میں ہونے والا زخم ان کی موت کا سبب بنا۔ یہ بھی کہا گیا ہے کہ خود کش حملہ آور وہی شخص تھا جس نے گولی چلائی اوریہ کہ دو خود کش حملہ آوروں کی موجودگی کا مفروضہ بھی غلط ہے۔

اخبار کے مطابق یہ رپورٹ ایکسرے مختلف تصاویر اور سیل فونز کے معائنے کے بعد تیار کی گئی ہے اور یہ رپورٹ آصف علی زرداری اور بلاول بھٹو زرداری کو بھی پیش کی جائے گی ۔ اخبار کے مطابق یہ معلومات اسے پاکستانی حکام کی جانب سے دی گئی ہے اوریہ کہ یہ رپورٹ صدر پرویز مشرف کو پہلے ہی پیش کی جا چکی ہے ۔

رپورٹ میں یہ واضح نہیں کیا گیا کہ پوسٹ مارٹم کے بغیر ہی اسکاٹ لینڈ یارڈ اس نتیجے پر کیسے پہنچی ۔کیونکہ جائے وقوعہ کو صاف کر دیا گیا تھا جس کے باعث تمام شواہد ضائع ہو گئے تھے ۔

اسکاٹ لینڈ یارڈ کا کہنا ہے کہ مسلح شخص ایک ہی تھا جس نے گولی چلائی اور جس کو مختلف کیمروں سے مدد سے بھی دکھایا گیا ۔رپورٹ پیپلز پارٹی کے شریک چیئرمین آصف علی زرداری اور بلاول بھٹو زرداری کو بھی پیش کی جائے گی۔

سپریم کورٹ بار کے صدر اعتزاز احسن نے کہا ہے کہ بینظیر بھٹو کی شہادت پر سکاٹ لینڈ یارڈ کی تحقیقاتی رپورٹ کی کوئی حیثیت نہیں ہے کیونکہ بینظیر بھٹو اور دیگر شہداء کا پوسٹ مارٹم نہ ہونے، تمام شواہد مٹانے اور جائے وقوعہ کو دھونے کے بعد تحقیقات کی کوئی حیثیت باقی نہیں رہی۔انہوں نے پنجاب انسٹیٹیوٹ آف کارڈیالوجی میں معائنے کے موقع پر میڈیا سے گفتگو کرتے ہوئے کہا کہ پرویز مشرف مسلم لیگ (ق) کو عوامی جلسوں میں اپنی پارٹی قرار دے چکے ہیں، اس طرح انتخابات صدرمشرف کے حامی اور مخالف گروپوں میں ہوں گے۔

ان کا کہنا تھا کہ حالیہ انتخابات میں دھاندلی متوقع ہے، اگر( ق) لیگ اکثریت حاصل نہ کر سکی تو صدرمشرف کو استعفیٰ دینا چاہیے۔سپریم کورٹ بار کے صدر اعتزاز احسن کا کہنا تھا کہ بینظیر بھٹو کی رسم چہلم میں شرکت کیلئے صوبہ سندھ اور پنجاب حکومتوں کو درخواست دی تھی جس پر سندھ سے جواب نہیں دیا اور پنجاب حکومت نے سندھ میں داخلے پر پابندی کو بنیاد بنا کر اجازت نہیں دی۔ انہوں نے کہا کہ عدلیہ کی بحالی کیلئے وکلاء اور سیاستدانوں کو حلف اٹھانا چاہیے۔