اسلام آباد (نمائندہ جنگ/ایجنسیاں) بینظیر بھٹو قتل کیس کی تحقیقات کے سلسلے میں اسکاٹ لینڈ یارڈ ٹیم نے برطانیہ سے مزید ماہرین بلا لیے ہیں۔ ذرائع نے بتایا کہ ا سکاٹ لینڈ یارڈ ٹیم نے بینظیر بھٹو قتل کیس میں پیش کیے جانیوالے شواہد پر عدم اطمینان کا اظہار کیا ہے۔ ٹیم نے ناکافی شواہد کے بعد تحقیقاتی عمل کو آگے بڑھانے کیلئے برطانیہ سے مزید ماہرین کو بلایا ہے جو اگلے چند روز میں اسلام آباد پہنچ جائینگے۔ا سکاٹ لینڈ یارڈ کی ٹیم کو وزارت داخلہ کی طرف سے محترمہ بینظیر بھٹو کی سیکورٹی کیلئے اقدامات پر مبنی دستاویزات بھی فراہم کر دی گئی ہیں جس میں بتایا گیا ہے کہ چار موبائل گاڑیاں سفر کے دوران انکی بم پروف گاڑی کے آگے پیچھے اور دائیں بائیں جانب ہوتی تھیں اور محترمہ بینظیر بھٹو کو ایک بکس کی مانند محفوظ رکھا جاتا تھا۔ اسکاٹ لینڈ یارڈ کی ٹیم بینظیر بھٹو کے سیکورٹی منیجرز سے بھی تحقیقات کریگی۔ علاوہ ازیں گزشتہ روز اے پی پی کے مطابق سابق وزیراعظم بے نظیر بھٹو کے قتل کی تحقیقات کیلئے آنے والی برطانوی تحقیقاتی ادارے اسکاٹ لینڈ یارڈ کی چھ رکنی تحقیقاتی ٹیم نے سانحہ لیاقت باغ کی تحقیقات کا دائرہ وسیع کرتے ہوئے ہفتہ کو لیاقت باغ جلسہ گاہ میں جائے حادثہ کا باریک بینی سے جائزہ لیا۔ ایس ایس پی آپریشن یاسین فاروق نے خود کش حملے کے حوالے سے تمام امور پر برطانوی تحقیقاتی ٹیم کو بریفنگ دی۔ برطانوی ٹیم نے خود کش حملہ آور کا خاکہ، حملے کے حوالہ سے مختلف سوالات کے جواب اور بے نظیر بھٹو کے آنے جانے کا روٹ اور سیکورٹی پلان حاصل کر لیا۔ ٹیم نے جائے حادثہ کی مختلف زاویوں سے تصاویر بنائیں اور پولیس سے جائے حادثہ کے اردگرد سیکورٹی کے حوالے سے بات چیت کی۔ تفصیلات کے مطابق سانحہ راولپنڈی کی تحقیقات میں مدد دینے کیلئے پاکستان کے دورے پر آئی ہوئی اسکاٹ لینڈ یارڈ کی ٹیم نے لیاقت باغ جلسہ گاہ کا تفصیلی معائنہ کیا۔ ڈی آئی جی سی آئی ڈی چوہدری عبدالمجید، ڈی آئی جی راولپنڈی سیّد سعود عزیز، ایس ایس پی یاسین فاروق اور ڈی ایس پی راولپنڈی اسپیشل برانچ صادق مہدی بھی ٹیم کے ہمراہ تھے۔ اسکاٹ لینڈ یارڈ ٹیم کی آمد کے موقع پر جائے حادثہ کے گرد سیکورٹی زون قائم کر دیا گیا اور لیاقت باغ کو ٹریفک کیلئے بند کر دیا گیا جبکہ اردگرد عمارتوں پر پولیس تعینات کی گئی تھی۔

__________________