لاہور (جنگ نیوز) لاہور پولیس نے معروف وکیل چوہدری اعتزاز احسن کی رہائی کیلئے جدوجہد کرنے والے انسانی حقوق کے دو سرگرم امریکی کارکنوں کو گرفتار کرلیا ہے۔پنجاب یونین آف جنرلسٹس کے جوائنٹ سیکریٹری عامر سہیل کے مطابق امریکی شہریوں میڈی بینجمن اور ٹگی بیری کو دو گاڑیوں میں سوار اہلکاروں نے ہوٹل ہالیڈے اِن کے قریب سے اپنی حراست میں لیا۔اسلام آباد میں امریکی سفارتخانے کے پریس اتاشی الزبتھ کولٹن نے اپنے شہریوں کی گرفتاری کی تصدیق کی ہے۔انہوں نے کہا کہ گرفتار انسانی حقوق کے کارکنوں نے مشاورت کیلئے لاہور میں امریکی مشن سے رابطہ کیا ہے۔پولیس حکام نے نام ظاہرنہ کرنے کی شرط پر صحافیوں کو بتایا کہ گرفتاری کا حکم اعلیٰ حکام نے دیا اورگرفتار امریکی شہریوں کو ڈیپورٹ کیے جائے کا امکان ہے۔ گرفتاری سے قبل لاہور پریس کلب میں صحافیوں سے گفتگو کرتے ہوئے متھیالائٹ ہیلری نے کہا کہ پاکستانی عوام کو اپنے مستقبل کے بارے میں خود فیصلے کرنے چاہئیں اور اس میں امریکہ سمیت کسی کو بھی مداخلت نہیں کرنی چاہئے موجودہ حالات میں پاکستان میں شفاف انتخابات کا انعقاد ممکن نہیں کیونکہ انتخابی امیدواروں کو گرفتار کر لیا گیا ہے اور انہیں انتخابی مہم چلانے کی بھی اجازت نہیں جبکہ دوسری طرف پی سی او کے تحت حلف نہ اٹھانے والے ججز بھی نظر بند ہیں۔ ہم نے گزشتہ روز امریکی سفیر کی چوہدری اعتزاز احسن کی رہائش گاہ پر آمد کے موقع پر ان کی گاڑی کے آگے کھڑے ہو کر صرف اس لئے احتجاج کیا تھا کیونکہ امریکہ اب بھی پاکستانی حکومت کو سپورٹ کر رہا ہے اور ہمارا مطالبہ تھا کہ وہ پاکستانی حکومت پر دباوٴ ڈالیں کہ تمام سیاسی قائدین، وکلاء اور ججز کو فوری طور پر رہا کرے۔ انہوں نے کہا کہ ہمارے پاکستان آنے کا مقصد صرف گرفتار سیاسی رہنماوٴں وکلاء اور دیگر کی رہائی کے لئے احتجاج کرنا ہے۔