لاہور (نمائندہ جنگ) سپریم کورٹ بار کے صدر بیرسٹر اعتزازاحسن کی گرفتاری اور ان پر پولیس تشدد کے خلاف سپریم کورٹ بار ایسوسی ایشن نے کل 26دسمبر کو یوم سیاہ منانے کا اعلان کر دیا ہے اور کہا ہے کہ ملک بھر کی بار کونسلوں اور بار ایسوسی ایشنوں کے دفاتر پر سیاہ جھنڈے لہرائے جائیں گے اور وکلاء احتجاجی مظاہرے کریں گے،ریلیاں و جلوس نکالیں گے اور عدالتوں کا مکمل بائیکاٹ کیا جائے گا۔ یہ اعلان سپریم کورٹ بار کے سیکرٹری امین جاوید چودھری، اقبال خان، رانا ضیاء، انورکمال، شوکت جاوید، محمد اظہر صدیق سمیت دیگر سینئر وکلاء نے مشترکہ پریس کانفرنس سے خطاب کرتے ہوئے کیا۔ انہوں نے کہاکہ بیرسٹر اعتزازاحسن کی دوبارہ گرفتاری کی مذمت کرتے ہیں۔ انہوں نے کہاکہ لاہور سے اسلام آباد جاتے ہوئے چکری کے مقام پر اعتزازاحسن کو گرفتار کر کے ان پر وحشیانہ تشدد کیا گیا۔ انہوں نے کہا یہ ریاستی دہشتگردی ہے اور سپریم کورٹ بار ایسوسی ایشن اس کی بھرپور مذمت کرتی ہے۔ انہوں نے کہاکہ سپریم کورٹ بار ایسوسی ایشن کے صبر کا پیمانہ لبریز ہوچکا ہے۔ حکومت جو اوچھے ہتھکنڈے استعمال کر رہی ہے، اس کے لئے ہم اور راستے بھی اختیار کریں گے۔ انہوں نے معزول چیف جسٹس آف پاکستان افتخار محمد چودھری کو نماز عید نہ پڑھنے دینے کی شدید مذمت کی اور ذمہ دار لوگوں کے خلاف کارروائی کرنے کا مطالبہ کیا ۔ سینئر ایڈووکیٹ انورکمال نے کہاکہ حکومت نے 30جنوری تک میڈیا پر پابندی مکمل طورپر ختم نہ کی تو 31جنوری کو لاہور پریس کلب میں 24گھنٹے کا بھوک ہڑتالی کیمپ لگایا جائے گا۔

__________________