افریقین نیشن فٹبال:مصر اور کیمرون سیمی فائنل میں پہنچ گئے
گھانا . . . دفاعی چمپئن مصر اور کیمرون کی ٹیمیں افریقین نیشن کپ فٹبال ٹورنامنٹ کے سیمی فائنل میں پہنچ گئی ہیں ۔کوسامی گھانا کے بابا یارا اسپورٹس اسٹیڈیم میں کھیلے گئے کوارٹر فائنل میں مصر کامقابلہ انگولا سے تھا ، 23 وین منٹ میں مصر کوملنے والی پنالٹی کک پر حسنی عبدالربو نے گول اسکور کرتے ہوئے ٹیم کو برتری دلادی ، تاہم یہ سبقت چار منٹ ہی قائم رہی اور جوابی کارروائی میں انگولا کے Manuchoنے پچیس میٹرکے فاصلے سے کک لگاتے ہوئے گیند کو گول میں پہنچادیا۔ مصر کا دوسرا اور میچ کا فیصلہ کن گول 38 ویں منٹ میں ہوا جب احمد فتحی کے کراس پر امر ذکی نے گول اسکور کردیا۔ دوسرے ہاف میں کوئی ٹیم گول نہ کرسکی اور دو ایک کی فتح کے ساتھ مصر نے سیمی فائنل میں جگہ بنالی۔ادھرٹمالے Tamale اسٹیڈیم میں کھیلے گئے دوسرے کوارٹر فائنل میں کیمرون نے تیونس کو تین دو سے ہرادیا۔ اسٹیفن مبا نے اٹھارہویں منٹ میں کیمرون کو سبقت دلائی جسے نو منٹ بعد گیرمنی نے دگنا کردیا۔ تیونس کے چوکی بن سعدا نے 35ویں منٹ میں گول کر کے اسکور دو ایک کر دیا ، میچ کے خاتمے سے نو منٹ قبل تیونس کے یاسین نے گول کرتے ہوئے مقابلہ برابر کردیا ، تاہم انجری ٹائم میں اسٹیفن مبا نے گول بنا یا اور کیمرون کو سیمی فائنل میں پہنچا دیا ۔

__________________