افغانستان میں بھارت کے بڑھتے ہوئے اثر رسوخ پر پاکستان میں تشویش بڑھ رہی ہے اور ایسے میں کچھ تجزیہ کاروں کا کہنا ہے کہ امریکہ اور نیٹو کے لیے دہشت گردی کے خلاف جنگ میں کامیابی کی خاطر یہ بہت مشکل ہوگا کہ وہ پاکستانی نکتہ نظر کو نظر انداز کریں۔

پاکستان کے وزیر دفاع چودھری احمد مختار نے منگل کو کہا ہے کہ افغانستان میں بھارت کے بڑھتے ہوئے اثرو رسوخ پر پاکستان کو سخت تشویش ہے۔ برطانوی بحریہ کے سربراہ ایڈمرل سر مارک سٹینہوپ سے ملاقات میں انہوں نے کہا کہ ’افعانستان میں بھارت کا کوئی بھی کردار پاکستانی مفادات کے خلاف ہے۔‘

ایسی ہی تشویش کا اظہار پاکستان کے آرمی چیف جنرل اشفاق پرویز کیانی گزشتہ روز فوجی ہیڈ کوارٹر میں صحافیوں کے ایک گروپ سے گفتگو میں ظاہر کرچکے ہیں۔

جنرل اشفاق پرویز کیانی نے امریکہ اور نیٹو پر زور دیا ہے کہ وہ افغانستان کے بارے میں واضح پالیسی اپنائیں اور پاکستان کے سٹریٹیجک مفادات اور تشویش کو مد نظر رکھیں۔ انہوں نے افغانستان میں بھارت کے بڑھتی ہوئی موجودگی پر تشویش ظاہر کی اور افغان نیشنل آرمی کو تربیت دینے کی خواہش کا اظہار بھی کیا ہے۔

پاکستانی فوج کے سربراہ نے افغانستان کی نیشنل آرمی کو پاکستان کی جانب سے تربیت فراہم کرنے کی بات ایسے وقت میں کہی ہے جب بھارت بھی افغان آرمی کی تربیت کی خواہش ظاہر کر چکا ہے۔

جنرل اشفاق پرویز کیانی نے کہا ہے کہ وہ افغانستان میں گہری دلچسپی ضرور رکھتے ہیں لیکن افغانستان پر اپنا کنٹرول نہیں چاہتے۔ ان کے مطابق اگر افغانستان کی فوج پاکستانی فوج سے مقابلے کی پوزیشن میں آجاتی ہے تو یہ یقینن پاکستان کے لیے لمحہ فکریہ ہوگا۔

آرمی چیف جنرل اشفاق پرویز کیانی نے یہ بریفنگ ایسے وقت میں دی ہے جب وہ گزشتہ ہفتے برسلز میں نیٹو کمانڈرز سے ملاقات میں اپنی تشویش ظاہر کرچکے ہیں۔ بریفنگ میں موجود صحافی اور تجزیہ کار زاہد حسین کے بقول پاکستانی فوج کے سربراہ کی بریفنگ کا مقصد افغانستان کے بارے میں امریکہ اور نیٹو کی پالیسی اور بالخصوص بھارت کے بڑھتے ہوئے اثر رسوخ کے بارے میں اپنی تشویش کو اجاگر کرنا نظر آیا۔

لیکن زاہد حسین کہتے ہیں کہ افغانستان کی نیشنل آرمی کی تربیت کے بارے میں امریکہ اور نیٹو کوئی درمیانی راستہ تلاش کرے گا۔’دیکھیں جس طرح اب تک جرمنی اور دیگر یورپی ممالک افغانستان کی فوج کی تربیت کرتے آئے ہیں مجھے لگتا ہے کہ اب بھی وہی کریں گے۔‘

زاہد حسین نے کہا کہ موجودہ حالات میں دہشت گردی کے خلاف جنگ میں کامیابی کے لیے امریکہ اور نیٹو یقینن پاکستانی تشویش کو مد نظر رکھ کر فیصلے کریں گے کیونکہ بصورت دیگر اس کے منفی نتائج نکل سکتے ہیں جو کسی بھی فریق کو قابل قبول نہیں ہوں گے۔

آرمی چیف نے شمالی وزیرستان میں فوجی کارروائی نہ کرنے کے تاثر کو رد کرتے ہوئے کہا کہ وہاں پہلے ہی ایک ڈویژن فوج تعینات ہے اور جب بھی ضروری ہوا تو کارروائی کی جائے گی۔ تاہم انہوں نے کہا کہ اب تک جو کچھ پاکستانی فوج نے آپریشن کیے ہیں اس کی وجہ سے افغانستان میں نیٹو اور امریکی اتحادی افواج کے خلاف طالبان کے حملوں میں کمی واقع ہوئی ہے۔

زاہد حسین نے بتایا کہ بریفنگ کے دوران پاکستانی آرمی چیف انہیں کافی پراعتماد نظر آئے اور ان کی باتوں سے انہیں ایسا محسوس ہوا کہ نیٹو کے کمانڈرز نے حالیہ برسلز کانفرنس میں پاکستانی نکتہ نظر کو تقویت دی ہے۔

آرمی چیف نے صحافیوں کے ایک گروپ سے بات کرتے ہوئے مزید کہا ہے کہ دہشت گردی کے خلاف جنگ میں پاکستانی فوج کے بارہ سو پچھہتر کے قریب افسر اور جوان مارے گئے ہیں اور خطے میں استحکام کے لیے پاکستان اپنے مفادات پر سمجہوتہ نہیں کرے گا۔
بی بی سی اردو

__________________

اور اس نے میرے ساغر میں
مئے سرخ انڈیلی ۔۔۔ تو کہا
مت سوچو !