کابل، ایمسٹرڈیم (ایجنسیاں) افغانستان کے مختلف علاقوں میں نیٹو فورسز کی فضائی بمباری، جھڑپوں اور خودکش حملے میں ہالینڈ کے دو فوجی اور 10 افغان پولیس اہلکار سمیت 14 افراد ہلاک اور متعدد زخمی ہوگئے۔ صوبہ قندھار کے ضلع میوند میں جسے طالبان کا مضبوط گڑھ سمجھا جاتا ہے۔8 پولیس اہلکار اس وقت ہلاک ہوگئے جب جنگجوؤں نے پولیس پوسٹ پر دھاوا بول دیا۔ واقعہ کے بعد مزاحمت کار بڑی مقدار میں اسلحہ اور پولیس کی 2 گاڑیاں لے گئے۔ ایک علیحدہ واقعہ میں صوبہ ہلمند کے ضلع لشکرگاہ میں ایک حملہ آور نے اس وقت خود کو اڑا لیا جب پولیس نے اسے روکنے کی کوشش کی۔ دھماکے میں ایک پولیس اہلکار موقع پر ہلاک ہوگیا جبکہ دیگر6 اہلکار زخمی ہوگئے۔ صوبہ قندھار کے ضلع زہاری میں نیٹو فوج سے جھڑپ میں3 جنگجو مارے گئے۔ ہالینڈ کی وزارت دفاع سے جاری ہونے والے بیان میں کہا گیا ہے کہ افغانستان کے صوبہ اورزگان میں طالبان کے ساتھ جھڑپ میں دو فوجی مارے گئے۔ ہلاک ہونے والے ہالینڈ کے فوجی افغان افواج کے ساتھ طالبان کیخلاف مشترکہ فوجی آپریشن میں شریک تھے۔ تفصیلات کے مطابق جھڑپیں دیعہ داؤد ضلع میں ہوئیں ان ہلاکتوں سے افغانستان میں ہلاک ہونے والے ہالینڈ کے فوجیوں کی تعداد 14 ہوگئی ہے۔ دوسری جانب نیٹو فورسز نے شمالی صوبہ کپیسا میں ایک طالبان کمانڈر اور ان کے ساتھیوں کے ٹھکانے پر فضائی حملہ کیا ہے۔ کابل میں نیٹو فورسز کی طرف سے جاری بیان میں کہا گیا ہے کہ نیٹو فورسز نے صوبے کے گاؤں کاپاشا کاری میں طالبان کے ایک ٹھکانے پر بمباری کی ہے جس میں سینئر طالبان کمانڈر اپنے ساتھیوں سمیت موجود تھے تاہم بیان میں ہلاکتوں کے بارے میں کچھ نہیں بتایا گیا ہے۔ طالبان کی طرف سے بھی کوئی بیان سامنے نہیں آیا ہے۔