فغانستان: نیٹو کی بمباری سے 142 کی ہلاکت کی خبر، جرمن فوج کا سربراہ مستعفی

برلن( جنگ نیوز) افغانستان میں نیٹو کی بمباری سے 142 افراد کی ہلاکت کی خبر پر جرمن فوج کے اعلیٰ ترین جنرل چیف آف اسٹاف جنرل وولف گانگ شنی درہن نے اپنے عہدے سے استعفیٰ دیدیا ہے، وزیر خارجہ پیٹر وچرٹ بھی اس واقعے کی ذمہ داری قبول کررہے ہیں۔ جرمن وزیر دفاع جنھوں نے گزشتہ ماہ ہی فرانز جوزف سے عہدے کاچارج لیا ہے اس بات کی تصدیق کی کہ حملے کی رپورٹ روک لی گئی تھی اور انھیں خود بھی اس کے بارے میں بدھ کو پہلی مرتبہ علم ہوا۔ اس بات کاانکشاف جرمنی کے وزیر دفاع کارل تھیوڈور ن زو گٹن برگ نے پارلیمنٹ میں کیا انھوں نے یہ انکشاف اخبارات میں ان خبروں کی اشاعت کے بعد کیا جس میں 4 ستمبر کے حملے کے بارے میں فوجی رپورٹ دبائے جانے کاانکشاف کیاگیاتھا۔ وزیرداخلہ نے پارلیمنٹ کو بتایا کہ چیف آف اسٹاف کو خود ان کی درخواست پر ان کی ذمہ داریوں سے سبکدوش کردیاگیا ہے، ایک جرمن کمانڈر کرنل جارج کلین نے 2 ٹینکروں پر طالبان کے قبضے کے بعدنیٹو سے ان پربمباری کی درخواست کی تھی، نیٹو کے ایک ذریعے نے بتایا کہ 2 امریکی ایف 15 طیاروں سے کہا گیا تھا کہ وہ صرف نیچی پروازیں کر کے اپنی طاقت کامظاہرہ کریں لیکن جرمن کمانڈر نے کہا کہ وہ بم گرائیں، یہ بمباری افغانستان میں ایک لاکھ بین الاقوامی فوج کے نئے امریکی کمانڈر جنرل اسٹینلے مک کرسٹل کی جانب سے دیئے گئے ان احکامات کے فوری بعد کی گئی جس میں انھوں نے ہدایت کی تھی کہ شہریوں کی ہلاکت سے گریز کیاجائے۔