افغان تنازعہ کے پائیدار حل کیلئے ضرورت پڑنے طالبان سے بات چیت کر سکتے ہیں
امریکی وزیر دفاع رابرٹ گیٹس کی صحافیوں سے گفتگو
واشنگٹن ……………امریکی وزیرِ دفاع رابرٹ گیٹس نے افغانستان میں تعینات برطانوی فوج کے کمانڈر کی طرف سے افغانستان کے مسئلہ کے حل کیلئے طالبان سے بات چیت کے بارے میں دیئے گئے بیان کی حمایت کرتے ہوئے کہا ہے کہ افغان تنازعہ کے پائیدار حل کیلئے ہم ضرورت پڑنے پر ایسے طالبان سے بات چیت کر سکتے ہیں جو افغان حکومت سے مل کر کام کرنے پر تیار ہوں گے۔ منگل کو امریکی ذرائع ابلاغ کے مطابق امریکی وزیر دفاع نے کہا کہ برطانوی کمانڈر کا یہ کہنا درست نہیں کہ افغانستان کی جنگ جیتی نہیں جا سکتی۔ یاد رہے کہ افغان صوبے ہلمند میں برطانوی فوج کے کمانڈر بریگیڈیئر مارک کارلٹن سمتھ نے حال ہی میں ایک برطانوی اخبار کو دیے گئے انٹرویو میں کہا تھا کہ برطانیہ کو افغانستان میں فیصلہ کن جیت کی امید نہیں رکھنی چاہیے۔ ان کا کہنا تھا کہ جب بین الاقوامی فوج افغانستان سے واپس جائے گئی اس وقت بھی ملک میں شورش کی چنگاری سلگتی رہے گی۔ برطانوی کمانڈر کے بیان کے بعد افغانستان میں برسرِ پیکار اتحادی افواج کے کمانڈر بریگیڈیئر رچرڈ بلانشٹ نے بھی کہا ہے کہ افغانستان کا کوئی عسکری حل نہیں ہے جبکہ افغانستان میں اقوامِ متحدہ کے خصوصی نمائندے کائی عیدی کا کہنا ہے کہ ہم سب جانتے ہیں کہ ہم افغانستان میں عسکری لحاظ سے نہیں جیت سکتے اور افغانستان میں کامیابی کیلئے سیاسی ذرائع استعمال کرنا ہوں گے۔ ان بیانات پر نیٹو میں شامل ممالک کے وزرائے دفاع سے ملاقات کے لیے بوڈا پسٹ جاتے ہوئے رابرٹ گیٹس نے دورانِ سفر صحافیوں کو بتایا کہ اگرچہ برطانوی کمانڈر کی جانب سے’فیصلہ کن عسکری فتح‘ کو ناممکن قرار دینا درست نہیں تاہم اس مسئلے کے پائیدار حل کیلئے ایسے طالبان سے بات چیت کرنے کی ضرورت پڑ سکتی ہے جو افغان حکومت سے مل کر کام کرنے پر تیار ہوں۔ رابرٹ گیٹس نے کہا کہ اگرچہ ہمیں افغانستان میں مشکلات کا سامنا ہے لیکن شکست یا پھر مستقبل میں فتح کے مواقع میں کمی کے بارے میں سوچنا یقیناً کوئی وجہ نہیں ہے۔ انہوں نے کہا کہ اس مسئلہ کے حل کا ایک حصہ افغان سکیورٹی فورسز کو طاقتور بنانا ہے جبکہ دوسرا حصہ ان لوگوں سے مفاہمت کرنا ہے جو افغان حکومت کے ساتھ کام کرنے پر راضی ہیں۔ رابرٹ گیٹس کا یہ بھی کہنا تھا کہ وہ نیٹو ممالک پر زور دیں گے کہ وہ افغانستان میں مزید فوج بھیجیں۔
٭٭٭٭٭٭٭