اقتدار سے رخصتی کی تجویز بلاجواز ہے،صدر پرویز کو امریکی سینیٹروں نے نہیں پاکستانی پارلیمنٹ نے منتخب کیا،صدارتی ترجمان
اسلام آباد (جنگ نیوز ) صدار تی ترجمان میجر جنرل(ر)راشد قریشی نے امریکی سینیٹروں کی جانب سے صدرپرویز مشرف کواقتدار سے رخصتی کیلئے باوقار راستہ دینے کی تجویزکو مسترد کرتے ہوئے کہاہے کہ صدرپرویز کو پاکستانی ایوانوں نے منتخب کیا ہے نہ کہ امریکی سینیٹروں نے،اس لئے ان کی یہ تجویز بلاجوازہے۔ ایک انٹرویو میں راشد قریشی نے کہا کہ صدرپرویز مشرف کو گزشتہ سال5 سال کیلئے منتخب کیا گیاہے، وہ ملک کے منتخب صدرہیں اور ان کو امریکی سینیٹرزنے منتخب نہیں کیا ۔انہوں نے کہا کہ میں یہ مناسب نہیں سمجھتا کہ ان لوگوں کی ہر بات کا جواب دیاجائے تاہم یہ تجویز بلا جوازہے ۔ ایک اور انٹرو یومیں صدارتی ترجمان نے کہاکہ صدرپرویز مشرف پر کوئی اندرونی یا بیرونی دباؤ نہیں،وہ قوم کے منتخب نمائند و ں کا احترام کرتے ہیں اور کسی بھی اتحاد کے ساتھ چلنے کیلئے تیار ہیں جبکہ صدرنے آزادانہ انتخابات کا وعدہ پوراکیاہے،ان کی واپسی کی باتیں اندرون اور بیرون ملک کی جا رہی ہیں تاہم زمینی حقائق کچھ اور ہیں۔

__________________