سیہون (نامہ نگار) پیپلز پارٹی کی چیئر پرسن بینظیر بھٹو نے کہا ہے کہ ہماری پارٹی نے ہمیشہ عوام کی خدمت کی ہے، پانچ سال تک اقتدار میں رہنے والوں نے عوام کو بھوک، بیروزگاری، مہنگائی کے سوا کچھ نہیں دیا اور وقت لوگ خود کشی پر مجبور ہیں۔ یہ بات انہوں نے دس سالہ جلاوطنی کے بعد پہلی بار سیہون میں زائرین اور پیپلز پارٹی کے کارکنوں سے خطاب کرتے ہوئے کہی۔ پیپلز پارٹی کی چیئرپرسن بینظیر بھٹو صبح پانچ بجے بغیر سیکیورٹی کے سیہون پہنچیں۔ اس موقع پر لوگوں نے ان کا شاندار استقبال کیا۔ انہوں نے قلندر لال شہباز کے مزار پر ہونے والے تاج پوشی میں بھی شرکت کی اور چادر چڑھائی۔ انہوں نے خواتین زائرین سے مل کر ان سے خیریت معلوم کی۔ اس موقع پر انہوں نے کہا کہ قلندر شہباز کے شہر میں آکر میں حلفیہ طور پر کہتی ہوں کہ اقتدار میں آکر بھوک، بدحالی اور بیروزگاری کا خاتمہ کیا جائے گا۔ انہوں نے کہا کہ میں اپنی جدوجہد کا آغاز قلندر لال شہباز کے مزار پر حاضری دے کر کر رہی ہوں، مجھے امید ہے کہ 8 جنوری کو پورے ملک میں پیپلز پارٹی کے امیدوار کامیاب ہونگے جبکہ مخالفین عوام کے سمندر میں بہہ جائیں گے۔

__________________