نیویارک ( جنگ نیوز) اقوام متحدہ کے سیکرٹری جنرل بان کیمون نے ایمرجنسی کے نفاذ کے خلاف بیان پر پاکستان کے احتجاج کو سختی سے مسترد کرتے ہوئے جلد از جلد جمہوریت بحال کرنے پر زور دیا ہے۔ انہوں نے کہا کہ میں پاکستان کی صورتحال پر خطے کے ممالک کے ساتھ رابطے میں ہوں لیکن جنرل پرویز مشرف سے براہ راست بات نہیں کی، صحافیوں سے گفتگو کرتے ہوئے بان کیمون نے کہا کہ وہ اپنے بیان پر قائم ہیں اور انہوں نے اقوام متحدہ میں پاکستان کے مستقل مندوب منیر اکرم کے ساتھ پاکستان کی صورتحال پر سخت تشویش اور افسوس کا اظہار کیا ہے۔ میں نے ان پر زور دیا ہے کہ پاکستانی حکومت کو جلد از جلد جمہوری عمل کی طرف لوٹنا چاہئے، پاکستانی قیادت تمام سیاسی اسیروں کو رہا اور میڈیا پر عائد پابندیاں ختم کی جائیں، وکلاء خصوصاً مذہبی آزادی اور عقائد کے بارے میں خصوصی نمائندہ عاصمہ جہانگیر کو رہا کیا جائے۔دریں اثناء یورپی یونین نے ایک بار پھر مطالبہ کیا ہے کہ پاکستان میں فوری طور پر ایمرجنسی ختم کرکے آئین کو بحال اور گرفتار شدگان کو رہا کیا جائے۔ یورپی یونین کے صدر ملک پرتگال کی جانب سے جاری کئے جانے والے ایک بیان میں کہا گیا ہے کہ یورپی یونین ایمرجنسی کے خاتمے، گرفتار شدگان کی رہائی اور شیڈول پر انتخابات کے انعقاد کو ضروری سمجھتی ہے۔ یورپی یونین اس بات کو تسلیم کرتی ہے کہ پاکستان کو امن و سلامتی کے حوالے سے خطرات کا سامنا ہے لیکن ہم اس امر پر یقین رکھتے ہیں کہ استحکام اور ترقی کا مقصد جمہوریت، انسانی حقوق کے احترام اور قانون کی حکمرانی سے ہی حاصل ہوسکتا ہے۔ ادھر برطانیہ کے وزیر خارجہ ڈیوڈ ملی بینڈ نے ایک بار پھر پاکستان سے ایمرجنسی کا خاتمہ اور جنوری میں ہونے والے انتخابات کی تاریخ کے اعلان کا مطالبہ کیا ہے اور خبردار کیا ہے کہ موجودہ صورتحال کے باعث برطانیہ کی جانب سے پاکستان کو دی جانے والی امداد پر اثر پڑ سکتا ہے۔ فرانس نے بھی پاکستان سے مطالبہ کیا ہے کہ ایمرجنسی کا فوراً خاتمہ کیا جائے۔ آسٹریلیا کے وزیر خارجہ الیگزینڈر ڈاؤنر نے جنرل پرویز مشرف کو ایک آمر قرار دیتے ہوئے کہا ہے کہ ایسا معلوم ہوتا ہے کہ جنرل پرویز مشرف کو خدشہ تھا کہ کہیں سپریم کورٹ ان کے دوبارہ انتخاب کو غیر آئینی قرار نہ دے دے اس لئے انہوں نے ایمرجنسی نافذ کردی۔ انہوں نے کہا کہ ہمارا جنرل پرویز کیلئے یہ پیغام ہے کہ وہ جمہوری راہ کی طرف واپس آجائیں۔

__________________