ایم کیو ایم کے قائد الطاف حسین نے کہا ہے کہ محب وطن جرنیل کرپٹ سیاستدانوں کے خلاف مارشل لاء لگائیں تو وہ اس کی حمایت کریں گے۔ انہوں نے کہا کہ جاگیرداروں اور وڈیروں نے اپنی زمینیں بچانے کے لئے سیلاب کا رخ غریبوں کی طرف موڑا' فوج ان کا ساتھ نہ دے اور امریکہ بھی ان کے حوالے سے پالیسیاں بدلے۔ انہوں نے کہا کہ سیاسی اکابرین ایک بار پھر ملک کے ٹکڑے کرنے پر تلے ہوئے ہیں۔ انہوں نے کہا کہ انقلاب فرانس کی طرح جاگیرداروں کو نشان عبرت بنا دیا جائے۔ وہ کراچی میں ورکرز کنونشن سے ٹیلی فونک خطاب کر رہے تھے۔
دوسری جانب فاروق ستار کا کہنا ہے کہ ملک آئی سی یو میں ہے اور الطاف بھائی کا بیان قوم کے دل کی آواز ہے۔
الطاف حسین کے بیان پر مسلم لیگ (ن) اور پیپلزپارٹی کی جانب سے سخت ردعمل سامنے آیا ہے۔ پیپلزپارٹی کے بیان کو افسوسناک قرار دیا ہے جبکہ مسلم لیگ نے سوال کیا ہے کہ کیا ایم کیو ایم ملک توڑنا چاہ رہی ہے؟
الطاف حسین نے جن حالات میں یہ بیان دیا ہے ان کے معروض میں جو کچھ چھپا ہوا ہے' اسے دیکھتے ہوئے اس بیان پر کوئی حیرت نہیں ہونی چاہیے۔ صرف دو اڑھائی سال کے عرصے میں سیاستدانوں نے ملک کو ایسی حالت سے دوچار کر دیا ہے کہ لوگوں میں جینے کی امنگ ہی ختم ہوتی جارہی ہے۔ بڑے لوگوں کی کرپشن کے خلاف سپریم کورٹ بے بس ہوگئی۔ لوٹ مار اپنے عروج پر پہنچ گئی اور غریبوں کی زندگی اجیرن کر دی گئی۔
حالیہ سیلاب میں جاگیرداروں اور وڈیروں نے اپنی زمینیں بچانے کے لئے سیلاب کا رخ غریبوں کی طرف موڑ دیا جس سے لاکھوں غریبوں کی عمر بھر کی جمع پونجی ضائع ہوگئی۔ ان جاگیرداروں اور وڈیروں کے خلاف مقدمات درج ہونے چاہئیں تھے لیکن ان کا بال بھی بیکا نہیں ہوگا کیونکہ یہ لوگ حکومت میں شامل ہیں یقین سے کہا جاسکتا ہے کہ اس وقت اگر مارشل لاء آجائے تو ملک کا غریب اور مڈل کلاس طبقہ اس کی بھرپور حمایت کرے گا کیونکہ اس ملک کے عوام نے سیاستدانوں کے ایسے ایسے روپ دیکھ لئے ہیں کہ اب انہیں مروجہ سیاست سے شدید نفرت ہوگئی ہے۔ اس ملک کے عوام اب روایتی قسم کا مارشل لاء نہیں چاہتے بلکہ ایک ایسا مارشل لاء چاہتے ہیں جس میں مارشل لاء ایڈمنسٹریٹر کا ڈنڈا چلے تو کرپٹ لوگ قوم کا کھایا ہوا پیسہ اگل دیں اور بدعنوانوں کو ایسا بدترین انجام دیکھنا پڑے کہ ان کی آنے والی نسلیں بھی تھر تھرکانپیں۔
پاکستان کے عوام جانتے ہیں کہ موجودہ سیاسی لیڈر شپ میں سے کوئی بھی رہنما انقلاب کی قیادت کرنے کی صلاحیت نہیں رکھتا۔ اسی لئے ان کی خواہش ہے کہ اگر مارشل لاء آئے تو ایسا سخت مارشل لاء آئے کہ اس ملک میں پائے جانے والے تمام بگاڑ ختم ہو جائیں۔ مہنگائی مافیا' لینڈ مافیا اور اسی طرز کے جتنے بھی مافیاز ہیں ان سے وہی نمٹ سکتا ہے جس کا ان مافیاز کے ساتھ کوئی تعلق واسطہ نہ ہو۔ سیاستدانوں سے یہ توقع اس لئے نہیں کی جاسکتی کہ جب بھی کوئی لینڈ مافیا سامنے آتا ہے اور اس کی چھان بین شروع ہوتی ہے تو یہ معاملہ اس لئے ٹھپ ہو جاتا ہے کہ لینڈ مافیا کے لوگوں میں سے کچھ کا تعلق کوچہ سیاست سے نکل آتا ہے۔
الطاف حسین کی اپیل کا فوج کیا جواب دیتی ہے یہ تو ہمیں معلوم نہیں لیکن فوج کے بڑوں کو اب یہ بات سن لینی چاہیے کہ کرپٹ سیاستدانوں کے ہاتھوں پاکستان خاکم بدہن ڈوب رہا ہے۔ اگر ہم نے اس ملک کو بچانا ہے تو پھر بلاتاخیر اہم فیصلے کرنا ہوں گے۔ ان سیاستدانوں کی حالت تو یہ ہے کہ یہ سیلاب جیسے ایشوز پر بھی اکٹھے نہ ہوسکے جو دو کروڑ لوگوں کا بیڑہ غرق کر گیا۔ اس ایشو پر بھی یہ لوگ سیاست کر رہے ہیں۔ ایک دوسرے پر الزام اور جوابی الزام لگا رہے ہیں۔ آزاد عدلیہ اس قوم کی آخری امید تھی لیکن وہ بھی قوم کی توقعات پر پورا نہ اتر سکی۔ ججوں کی بحالی کے بعد قوم نے اعلیٰ عدالتوں سے جو امیدیں وابستہ کرلی تھیں وہ بھی پوری نہ ہوسکیں۔ سوال یہ ہے کہ عدلیہ اور فوج کے ادارے نے اگر اس موقع پر بھی مصلحت کوشی برقرار رکھی تو اس ملک اور قوم کا انجام کیا ہوگا؟
کوئی الطاف حسین سے لاکھ اختلاف کرے لیکن یہ ماننا پڑے گا کہ ان کی دوربیں نظروں نے آنے والے حالات کو بھانپ لیا ہے اور انہوں نے درست طور پر یہ سمجھا ہے کہ اگر اب بھی فوج نے مداخلت نہ کی تو اگلے دو تین سال کے اندر اندر یہ سیاستدان اس ملک کو ایسے انجام سے دوچار کرکے رکھ دیں گے کہ جس کا تصور کرکے ہی بدن پر جھرجھری طاری ہو جاتی ہے۔
یہاں ہم الطاف حسین کی خدمت میں بھی ایک گزارش کرنا چاہیں گے بجا کہ انہوں نے ملک کو درپیش خطرے کا بروقت احساس کیا اور صاف سیدھی بات کی لیکن جب انہیں پتہ ہے کہ سیاستدان کرپٹ ہیں تو وہ حکومت کا حصہ کیوں بنے بیٹھے ہیں۔ وہ اگر حکومت سے باہر نکل آئیں تو یہ حکومت دھڑام سے نیچے جاگرے گی۔
اگر وہ سمجھتے ہیں کہ ان کے نکلنے کے بعد مسلم لیگ (ن) حکومت کو اپنا کندھا فراہم کرکے بچالے گی تو کیا ہوا' تاریخ میں ایم کیو ایم کا نام تو سنہری حرف میں لکھا جائے گا کہ جب اس نے دیکھا کہ ملک اور قوم کا سفینہ ڈوب رہا ہے تو اس نے نہ صرف حکومت چھوڑ دی بلکہ فوج کو مداخلت کرنے کو بھی کہا۔ الطاف حسین کو اب کھل کر میدان میں آنا چاہیے کیونکہ عوام جاگیرداروں' سرمایہ داروں اور وڈیروں شاہی کے ہاتھوں 63سال تک ذلیل ہونے کے بعد اب خوب سمجھ گئے ہیں کہ ان سیاستدانوں اور وڈیرہ شاہی کا چولی دامن کا ساتھ ہے اور یہ ایک ہی سکے کے دو رخ ہیں۔

__________________
جاویداسد