الطاف حسین دھمکی آمیز بیانات سے گریز کریں، غوث بخش مہر
کراچی (اسٹاف رپورٹر) پاکستان مسلم لیگ (ق) کے رکن قومی اسمبلی اور سابق وفاقی وزیر غوث بخش مہر نے کہا ہے کہ سندھ کے عظیم تر مفاد اور ہم آہنگی کے لئے الطا ف حسین کو دھمکی آمیز بیانات نہیں دینے چاہئیں میں نہ تو پیپلزپارٹی میں شمولیت اختیار کررہا ہوں اور نہ ہی مسلم لیگ (ن) میں جانے کا ارادہ رکھتا ہوں، میں مسلم لیگ (ق) میں ہوں اور اسی میں رہوں گا۔ انہوں نے کہا کہ فارورڈ بلاک تشکیل دینا غلط ہے، ہم چاہتے ہیں حکومت 5/ سال چلے اور عوامی مینڈیٹ کا احترام کیا جائے۔ وہ بدھ کو اپنی رہائش گاہ پر صحافیوں کے اعزاز میں دیئے گئے ظہرانے پر گفتگو کررہے تھے۔ غوث بخش مہر نے کہا کہ پیپلزپارٹی کے شریک چیئرمین آصف علی زرداری نے ایم کیو ایم کے مرکز نائن زیرو جاکر اپنی ”پگ“ (ٹوپی) اتار کر فا روق ستار کے سر پر رکھی، اس کے بعد ایسے بیانات زیب نہیں دیتے۔ غوث بخش مہر نے کہا کہ سندھ اسمبلی میں مسلم لیگ ( ق) کے دو ارکان نے فارورڈ بلاک بنایا ہے، ہم مسلم لیگ (ق) سندھ کے صدر ڈاکٹر ارباب غلام رحیم سے کہیں گے کہ وہ ان کے خلاف کارروائی کریں، قانون کے مطابق ان کی نشستیں ختم ہوسکتی ہیں، انہوں نے کہا کہ میرے اور میرے بیٹے کے خلاف درج مقدمات پولیس نے تحقیقات کے بعد ختم کردیئے ہیں سیاسی بنیادوں پر ایسے مقدمات نہیں بننے چاہئیں اس میں پیپلزپارٹی کا کوئی عمل دخل نہیں۔ انہوں نے کہا کہ ہم چاہتے ہیں کہ حکومت پانچ سال پورے کرے، حکمران اتحاد کے پاس بہت بڑا مینڈیٹ ہے، اگر یہ اتحاد ناکام ہوا تو پھر شاید ہی ملک میں سویلین راج آسکے، اتنی بڑی اکثریت والی حکومت کو غیر مستحکم کرنا صحیح نہ ہوگا، عوام کے فیصلے کا احترام کیا جانا چا ہئے۔ انہوں نے کہا کہ مسلم لیگ (ق) کے رکن سندھ اسمبلی انور مہر مجھ پر الزامات اس لئے لگا رہے ہیں کہ وہ وزارت حاصل کرنا چاہتے ہیں، انہوں نے کہا محترمہ بے نظیر بھٹو کی شہادت ایک بہت بڑا سانحہ ہے، وہ ایک عظیم لیڈر تھیں۔

__________________