لاہور (نمائندہ جسارت)جماعت اسلامی پاکستان کے ترجمان نے ایم کیو ایم کے قائد الطاف حسین کی طرف سے جماعت اسلامی پر لگائے گئے الزامات کو لغو، بے ہودہ اور جھوٹ کا پلندہ قرار دیتے ہوئے ان کی سختی سے تردید کی ہے ۔ اپنے بیان میں جماعت اسلامی کے ترجمان نے کہاکہ الطا ف حسین کی تقریر ایک حواس باختہ شخص کی تقریر تھی ۔ انہوں نے جس طرح میڈیا کو کسی تعطل کے بغیر 3 گھنٹے سے زائد یرغمال بنائے رکھا ، یہ عمل بذات خود میڈیا کی آزادی پر ایک سوال ہے ۔ تمام نیوز چینلز نے 9 بجے کے نیوز بلیٹن سے لے کر تمام ٹاک شوز اور اشتہارات کو معطل کر کے الطاف حسین کی بے سروپا پریس کانفرنس کو جس طرح لائیو دکھایا ہے ، اسے کیا نام دیا جائے گا ۔ ترجمان نے کہاکہ جب سے ایم کیو ایم کراچی میں قائم ہوئی ہے ، بوری بند لاشوں کا سلسلہ اس وقت سے شروع ہے ۔ اس سے پہلے کراچی پرامن اور روشنیوں کا شہر تھا ۔ ایم کیو ایم نے جماعت اسلامی اور اسلامی جمعیت طلبہ کے بیسیوں صالح نوجوانوں کو جس طرح ٹارچر سیلوں میں بدترین تشدد کر نے کے بعد قتل کر کے بوری میں بند کر کے پھینکا ، ان کا مقدمہ اللہ تعالیٰ کی عدالت میں درج ہو چکاہے ۔ الطاف حسین نے جماعت اسلامی پر جو کیچڑ اچھالااور جھوٹ کی تمام حدیں پھلانگی ہیں اس میں وہ گوبلز کو بھی پیچھے چھوڑ گئے ہیں۔ اس طرح وہ عوام کو گمراہ نہیں کر سکتے ۔ پاکستانی عوام خوب جانتے ہیں کہ جماعت اسلامی کا ملک میں کردار کیاہے ۔ 12 مئی کا واقعہ کی جس طرح انہوں نے دیدہ دلیری سے تردید کی ہے ، کوئی پاکستانی اس پر یقین نہیں کرے گا۔ کراچی شہر پر ایم کیو ایم کی حکومت تھی ، گورنر اور میئر ان کا تھا ۔ سی پورٹ اور شپنگ کی وزارت بھی انہی کے پاس تھی ، شہربھر میں جو کنٹینرز رکھ کر سڑکیں بلاک کی گئی تھیں وہ آسمان سے نہیں اترے تھے ،سی پورٹ سے ہی آئے تھے ۔ جماعت اسلامی کے ترجمان نے کہاکہ الطاف حسین نے ذوالفقار مرزا کے الزامات اور سپریم کورٹ میں اٹھائے گئے سوالات کا پریس کانفرنس جواب تک نہیں دیا بلکہ ادھر ادھر کی ہانکتے رہے کیونکہ ان کے پاس ان الزامات کا جواب ہی نہیں تھا ۔ ان حقیقی الزامات نے ان کو بوکھلاہٹ میں مبتلا کر دیاہے جو ان کی طویل تقریر سے صاف ٹپک رہی تھی ۔ ترجمان نے بیان کے آخر میں یہ سوال بھی کیا کہ الطاف حسین کی لائیو پریس کانفرنس میں چینلز کے اربوں روپے کے اشتہارات بھی رکے رہے ۔ ایم کیو ایم کے پاس اتنا پیسہ کہاں سے آیا کہ انہوں نے چینلز کو اربوں روپے ادا کر کے ان کا ٹائم خریدا ہے اور اگروقت خریدے بغیر چینلز نے ان کو وقت دیا تو کیا یہ بھتہ کے زمرے میں نہیں آتا؟

روزنامہ جسارت

__________________


http:// haroonazam.wordpress.com

ھارون اعظم کا بلاگ۔