لندن (پ ر) لاڑکانہ پریس کلب کے صدر و یوسی ناظم علی گل سانگی اور یونین آف جرنلسٹ کے صدر عبدالجبار بلوچ نے اس بات سے اتفاق کیا ہے کہ سندھ کے مستقل باشندوں میں تفریق پیدا کرنے کی ہر سازش کو باشعور عوام ناکام بنا دیں گے۔ وہ پیر کے روز متحدہ قومی موومنٹ کی رابطہ کمیٹی کے کنوینر ڈاکٹر عمران فاروق سے ٹیلی فون پر بات چیت کررہے تھے۔ علی گل سانگی اور عبدالجبار بلوچ نے سندھی عوام کے نام قائد تحریک الطاف حسین کے کھلے خط میں بیان کئے گئے نکات سے مکمل اتفاق کرتے ہوئے کہا کہ الطاف حسین کے خط سے سندھی عوام کو سازشی عناصر کے مکروہ عزائم کو سمجھنے میں بڑی مدد ملے گی۔ انہوں نے کہا کہ سندھی عوام باشعور ہیں اور وہ اپنے اتحاد سے سندھ کے مستقل باشندوں کے درمیان تفریق پیدا کرنے کی ہر سازش کو ناکام بنا دیں گے۔ ڈاکٹر عمران فاروق نے علی گل سانگی اور عبدالجبار بلوچ کے خیالات کو سراہتے ہوئے کہا کہ ایم کیو ایم شروع دن سے ہی سندھ کے مستقل باشندوں کے درمیان اتحاد اور بھائی چارے کے فروغ کیلئے عملی جدوجہد کرتی رہی ہے انہوں نے کہا کہ قائد تحریک الطاف حسین کے کھلے خط پر سندھ کے دانشور اور اہل قلم حضرات کی جانب سے مثبت ردعمل خوش آئند ہے۔