امریکی وزیر دفاع رابرٹ گیٹس نے کہا ہے کہ ایسا لگ رہا ہے کہ القاعدہ نے اپنی توجہ پاکستان پر مرکوز کر دی ہے۔
رابرٹ گیٹس نے واشنگٹن میں جمعہ کو صحافیوں سے بات کرتے ہوئے کہا کہ ’اس بات میں کوئی شک نہیں ہے کہ پاک افغان سرحد کے کچھ علاقوں میں القاعدہ نے اپنے آپ کو دوبارہ منظم کر لیا ہے‘۔

ان کا کہنا تھا کہ اس کے اثرات افغانستان پر نہیں پڑے ہیں لیکن اس وقت یوں لگتا ہے کہ القاعدہ کی توجہ پاکستان اور پاکستانی حکومت اور پاکستانی عوام پر حملے کرنے پر مرکوز ہے کیونکہ وہاں’حملوں میں تیزی آئی ہے‘۔

امریکی وزیرِ دفاع کا یہ بھی کہنا تھا کہ امریکہ تربیت اور ضروری سازوسامان کی فراہمی کے ذریعے انسدادِ دہشتگردی کے حوالے سے پاکستانی افواج کی صلاحیت کو مضبوط بنانا چاہتا ہے۔ انہوں نے کہا کہ’ ہم پاکستانی فوج کے نئے سربراہ سے اس معاملے پر بات کرنے کا ارادہ رکھتے ہیں کہ شدت پسندی کے خاتمے کے لیے کوششوں میں ہم کس طرح ان کی مدد کر سکتے ہیں‘۔

یاد رہے کہ حال ہی میں امریکی کانگریس نے امریکہ کی جانب سے پاکستان کو دی جانے والی فوجی امداد کے کچھ حصے کو’ کارکردگی سے مشروط‘ کر دیا تھا جس پر پاکستانی دفترِ خارجہ کے ترجمان نے کہا تھا کہ پاکستان اور امریکہ کے اچھے تعلقات خطے میں قیامِ امن، استحکام اور ترقی کے لیے بہت ضروری ہیں اور’اس قسم کی شرائط پاک امریکہ تعلقات کے لیے مفید نہیں‘۔

امریکی کانگریس کی جانب سے عراق اور افغانستان جنگ کے لیے صدر بش کی درخواست کردہ رقم کا نصف فراہم کرنے کی اجازت دینے پر رابرٹ گیٹس نے کہا کہ’ جنگ کے لیے چھوٹے چھوٹے ٹکڑوں میں رقم کی فراہمی سے ہمیں قلیل المدتی منصوبے بنانے اور قلیل المدتی فیصلے لینے پڑتے ہیں‘۔

امریکی کانگریس نے اس ہفتے سنہ 2008 کے لیے پانچ سو پچپن بلین ڈالر کے بجٹ کی منظوری دی ہے جس میں عراق اور افغانستان جنگ کے لیے ستّر بلین رکھے گئے ہیں۔