حج کرپشن الزامات کے تحت وزیر مذہبی امور حامد سعید کاظمی کو برطرف کر دیا گیا ہے۔ جبکہ وفاقی وزیر ، اعظم سواتی کو بھی برطرف کر دیا گیا ہے۔ حامد سعید کاظمی ، سیکرٹری مذہبی امور اور جوائنٹ سیکرٹری کے بینک اکائونٹس بھی منجمد کر دیئے گئے ہیں۔ حامد سعید کاظمی نے اپنی برطرفی پر کہا ہے کہ وزیر اعظم کے فیصلے پر انہیں کوئی اعتراض نہیں ہے جبکہ جے یو آئی نے اعظم سواتی کی برطرفی پر پارٹی کا ہنگامی اجلاس طلب کرلیا ہے۔
وزیر اعظم نے ایک اچھا اور تاریخی فیصلہ کرتے ہوئے حج کرپشن میں ملوث وفاقی وزیر حامد سعید کاظمی اور سیکرٹری مذہبی امور کو برطرف کرکے عملی احتساب کی طرف قدم بڑھایا ہے لیکن سوال یہ ہے کہ وفاقی وزیر، اعظم سواتی کو کس جرم میں برطرف کیا گیا ہے۔ حالانکہ اعظم سواتی وہ پہلے وزیر ہیں جنہوں نے حکومت میں رہتے ہوئے کرپشن کی نشاندہی کرکے اپنا قومی فرض ادا کیا ہے انہیں اس جرات مندانہ کردار پر برطرفی کی بجائے انعام ملناچاہیے لیکن ان کی برطرفی سے یہ تاثر ابھرتاہے کہ آئندہ کرپشن کرنے والا بھی زیر عتاب آئے گا اور اس کرپشن کی نشاندہی کرنے والا بھیبچ نہیں سکے گا۔ یہ منطق سمجھ سے بالاتر ہے حالانکہ اعظم سواتی نے سپریم کورٹ میں کہا تھا کہ وہ قرآن پر حلف اٹھا کر حامد سعید کاظمی کے خلاف ثبوت پیش کر رہے ہیں جس پر لطیف کھوسہ نے کہا تھا کہ ثبوت پیش کرنے سے قبل آپ استعفیٰ دیں تو اس پر عدالت عظمیٰ نے ریمارکس دیئے تھے کہ یہ کوئی جواز نہیں بنتا کہ ثبوت پیش کرنے والے استعفیٰ دیں۔ وزیر اعظم کا حج کرپشن میں ملوث وفاقی وزیر حامد سعید کاظمی کی برطرفی کا فیصلہ لائق تحسین ہے مگر دوسری طرف اعظم سواتی کی برطرفی سے نئے سوالات جنم لے رہے ہیں اور اعظم سواتی کی برطرفی سے دیگر وزراء اور ذمہ داران کو سمجھانے کی کوشش کی گئی ہے کہ اگر آپ بھی کرپشن کی نشاندہی کریں گے تو آپ کا انجام بھی یہی ہوگا۔ ہونا تو یہ چاہیے تھا کہ جس وقت میڈیا نے حج کرپشن کے ثبوت سامنے لائے تھے اس وقت وفاقی وزیر اخلاقی جرات کا مظاہرہ کرتے ہوئے مستعفی ہو جاتے یا حکومت ان عناصر کو اسی وقت برطرف کر دیتی لیکن یہ وطیرہ بنتا جارہا ہے کہ جب تک عدالت کسی بھی معاملے کا ازنوٹس نہیں لیتی اس وقت تک حکومت کوئی اقدام نہیں کرتی۔ اگر حکومت میڈیا کی نشاندہی پر قبل از وقت اقدامات کرتی تو اس سے عوام کی نظروں میں حکومت کی عزت افزائی ہوتی اور لوگوں کا حکومت پر کسی حد تک اعتماد بڑھ جاتا۔ لیکن اس وقت ہو یہ رہا ہے کہ جو کام حکومت کے کرنے کے ہیں حکومت ان پر توجہ نہیں دے رہی تو مجبوراً عدالت کو ازخود نوٹس لینا پڑتا ہے۔ یہی وہ نقطہ ہے جس سے حکومت کی ساکھ متاثر ہورہی ہے اور دو سری طرف یہ تاثر بھی پھیل رہا ہے کہ حکومت سیاسی مصلحتوں شکار ہوکر کرپشن کرنے والوں کا محاسبہ کرنے سے قاصر ہے۔ حکومت کو اپنے انداز حکمرانی میں تبدیلی لاتے ہوئے کچھ تلخ فیصلے کرناہوں گے چاہیے اس کیلئے اسے اپنے لوگوں کی قربانی کیوں نہ دیناپڑے۔ حکومت میڈیا کی نشاندہی پر بروقت ایسے اقدامات کرے جس سے کرپشن پر قابو پایا جاسکے۔ لیکن حکومت اسکے برعکس میڈیا پر الزام لگاتی ہے کہ میڈیا حکومت کے خلاف سازشیں کر رہا ہے اور حکومت کو کمزور کرنے کی کوشش کی جارہی ہے ۔ ایسے بیانات جمہوریت کی روح کے منافی ہیں۔
وفاقی وزیر حامد سعید کاظمی نے اگر بذات خود کرپشن نہیں بھی کی تو اس کرپشن کی تمام ذمہ داری بحیثیت وزیر ان پر ہی عائد ہوتی ہے ۔ ہونا تو یہ چاہیے تھا کہ جب ان پر کرپشن کا الزام لگا تو انہیں فوراً مستعفی ہوکر اپنے آپ کو احتساب کیلئے پیش کر دیناچاہیے تھا تاکہ ان کی ساکھ خراب نہ ہوتی۔ لیکن ہم میں اتنی اخلاقی جرات نہیں کہ ہم دنیا کی دوسری جمہوری قوتوں کا مقابلہ کرسکیں جہاں پر اگر ٹرین کا ایکسیڈنٹ ہو جائے تو ریلوے کا وزیر خود بخود استعفیٰ دے دیتا ہے۔لیکن ہمارے ہاں افسوس سے کہنا پڑ رہا ہے کہ جب تک ،بڑے بے آبرو ہوکر ترے کوچے سے ہم نکلے ،والی صورتحال پیش نہیں آتی ہم عہدوں اور وزارتوں سے چمٹے رہتے ہیں۔
وزیر اعظم نے ایک اچھا اقدام کیا ہے مگر وفاقی وزیر ، اعظم سواتی کی برطرفی سوالیہ نشان ہے نہ تو اعظم سواتی پر کرپشن کا کوئی کیس ہے اور نہ ہی انہوں نے کوئی ایسا اقدام اٹھایا ہے جس سے ملک و قوم کو نقصان ہو۔ یہ وہ واحد وزیر ہیں جنہوں نے بحیثیت وزیر کوئی مراعات نہیں لیں۔ انہوں نے تو انتہائی جرات کا مظاہرہ کرتے ہوئے قرآن پر حلف دے کر کرپشن کے ثبوت پیش کیے ہیں ایسے کرداروں کو انعام سے نوازا جاناچاہیے۔ حکومت نے ایک طرف حامد سعید کاظمی کو برطرف کرکے ایک اچھی روایت ڈالی تو دوسری طرف اعظم سواتی کو برطرف کرکے ایک انتہائی ناپسندیدہ عمل کے ذریعے اپنی ساکھ کو نقصان پہنچایا ہے۔
ضرورت اس امر کی ہے کہ اعظم سواتی کو جس جرم میں برطرف کیا گیا ہے اس کی تفصیلات بھی عوام کے سامنے لائی جائیں تاکہ عوام کو بھی معلوم ہوسکے کہ اعظم سواتی کو سچ بولنے کی سزا دی گئی ہے یا کرپشن کے ثبوت پیش کرنے والوں کو نشان عبرت بنانے کی روایت کا آغاز کیا جاچکا ہے۔
ہم سمجھتے ہیں کہ حامد سعید کاظمی اور وزارت مذہبی امور کے دیگر افسران کی برطرفی اور ان کے بینک اکائونٹس منجمد کرنے سے اللہ کے مہمانوں کو لوٹنے والوں کے احتساب کا عمل شروع ہوگا اور ضرورت اس امر کی ہے کہ حاجیوں کو لوٹنے والوں کو نہ صرف برطرف کیا جائے بلکہ انہیں قانون کے کٹہرے میں لاکر ان سے لوٹی ہوئی رقم کی ریکوری کرکے انہیں نشان عبرت بنادیا جائے تاکہ آئندہ کسی کو بھی مذہب کے نام پر لوٹنے کی جرات نہ ہو۔

__________________
جاویداسد