لاہور(جنگ نیوز) آل پارٹیز ڈیمو کریٹک موومنٹ کے کنوینر محمود خان اچکزئی نے کہا ہے کہ 18دسمبر کو قومی مجلس مشاورت میں انتخابات کا بائیکاٹ کرنے والی جماعتوں کے علاوہ وکلاء ‘ سول سوسائٹی ‘ ٹریڈ یونینزاور این جی اوز کے نمائندوں کو بھی مدعو کیا جائیگا۔ انتخابات کو ناکام بنانے کیلئے جلسے جلوسوں کی شکل میں ملک گیر عوامی رابطہ مہم شروع کی جائیگی اور عدلیہ کی 2نومبر کی پوزیشن پر بحالی ‘ غیر جانبدار الیکشن کمیشن اور تمام جماعتوں کی مشاورت سے نگران حکومت کے قیام تک اپنی جدوجہد جاری رکھیں گے جو جماعتیں انتخابات میں حصہ لیں گی وہ نہ صرف آمریت کی سپورٹ بلکہ عدلیہ اور جمہوریت کی بحالی کی تحریک پر شب خون ماریں گی۔ گزشتہ روز این این آئی سے ٹیلیفون پر خصوصی گفتگو کرتے ہوئے محمود خان اچکزئی نے کہا کہ ملک اس وقت سنگین حالات سے دوچار ہے۔ انہوں نے کہا کہ اگر افتخار محمد چوہدری سمیت دیگر 60ججز بحال نہ ہوئے تو پھر اس ملک کا اللہ ہی حافظ ہو گا کیونکہ جس ملک میں عدلیہ آزاد نہ ہو وہ معاشرہ ختم ہو جاتا ہے ‘اس لئے سیاسی جماعتوں کو بھی وکلاء کی طرح عدلیہ کی بحالی کی جنگ لڑنی چاہیے ۔

__________________