الیکشن کمیشن کو 3مارچ تک انتخابی نتائج کا نوٹیفکیشن جاری کرنا ہوگا
اسلام آباد (طاہر خلیل… نمائندہ خصوصی) آئینی ماہرین کا کہنا ہے کہ الیکشن کمیشن کو 3/مارچ تک قومی اور صوبائی اسمبلیوں کے نئے منتخب اراکین کا نوٹیفکیشن جاری کرنا ہوگا۔ آئین کے آرٹیکل 224(1) میں نوٹیفکیشن کے اجرا کی مدت کا تعین کیا گیا ہے۔ اس آرٹیکل میں کہا گیا ہے کہ انتخاب کے نتائج کا اعلان زیادہ سے زیادہ 14دن کے اندر کرنا ہوگا۔ اس طرح 18/فروری کو ہونے والے انتخابات کے نتائج کا باضابطہ اعلان 3/مارچ تک کرنا آئینی تقاضا ہے۔ الیکشن کمیشن کے ذرائع نے بتایا ہے کہ الیکشن کمیشن نے کامیاب امیدواروں سے انتخابی اخراجات کی تفصیلات طلب کی ہیں۔ اس لیے کامیاب امیدواروں کے نوٹیفکیشن کے اجرا میں تین چار روز لگ سکتے ہیں اور 27، 28/فروری تک نوٹیفکیشن جاری ہوسکتا ہے۔ ذرائع نے بتایا ہے کہ الیکشن کمیشن کی طرف سے نئے منتخب اراکین کے نوٹیفکیشن کے اجرا کے بعد قومی اسمبلی کا اجلاس طلب کرنے کیلئے آئین میں کسی مدت کا تعین نہیں کیا گیا۔ قومی اسمبلی کا اجلاس طلب کرنے کے سلسلے میں آئین کا آرٹیکل 54لاگو ہوگا جس کے تحت صدر، وزیراعظم کی ایڈوائس پر اجلاس طلب کرتے ہیں اور موجودہ صورت میں بھی صدر مملکت نگراں وزیراعظم کی ایڈوائس پر مناسب وقت پر نئی قومی اسمبلی کا اجلاس طلب کریں گے اور آئین کے آرٹیکل 65کے تحت نئی قومی اسمبلی میں پہلے اجلاس میں اراکین کا حلف ہوگا اور نئی اسمبلی کا پہلا بزنس اسپیکر اور ڈپٹی اسپیکر کا انتخاب ہوگا۔ ذرائع نے مزید بتایا ہے کہ اسپیکر اور ڈپٹی اسپیکر کے الیکشن کے بعد نئی قومی اسمبلی کا اجلاس ملتوی کردیا جائے گا اور بعد میں وزیراعظم کے انتخاب کیلئے قومی اسمبلی کا خصوصی اجلاس بلایا جائے گا۔ آئین کے آرٹیکل 53( کے تحت سبکدوش اسمبلی کے اسپیکر چوہدری امیر حسین نئی اسمبلی کے اجلاس کی صدارت کریں گے جس کیلئے انہوں نے قومی اسمبلی سیکریٹریٹ کو اپنی رضامندی سے آگاہ کردیا ہے۔ چوہدری امیر حسین منتخب اراکین سے حلف لیں گے اور ان کی صدارت میں ہی نئے اسپیکر کا انتخاب ہوگا جس کے بعد نئے اسپیکر کی صدارت میں ڈپٹی اسپیکر کی الیکشن منعقد کرایا جائے گا۔

__________________