14 اگست 2010 38 : 16
اسلام آباد(مانیٹرنگ ڈیسک)وزیراعظم سید یوسف رضا گیلانی نے کہا ہے کہ سیلاب زدگان کی بحالی کیلئے ایسے بورڈ کی تشکیل دی جائے گی جس کے ممبران پر بھروسہ کیا جا سکے اور لوگوں کو ان پر اعتماد ہو کہ ان کا پیسہ نہایت شفاف طریقے سے بحالی کے کاموں میں استعمال کیا جائے گا۔ یہ بات انہوں نے اسلام آباد میں میاں نواز شریف سے ملاقات کے بعد مشترکہ پریس کانفرنس کرتے ہوئے کہی ۔انہوں نے کہا کہ سیلاب سے اس قدر نقصان ہوا ہے کہ حکومت، عوام اور عالمی برادری کیلئے مل کر بھی اسے پورا کرنا بہت مشکل ہے ۔ وزیراعظم نے کہاکہ میاں نواز شریف نے اس سلسلے میں مفید تجاویز دی ہیں۔ ان کا کہنا تھا کہ اس وقت پوری دنیا مدد کیلئے تیار ہے ۔ انہوں نے بتایا کہ میاں نواز شریف اور وہ اکٹھے ہو کر عوام اور عالمی برادری کے پاس امداد کیلئے جائیں گے ۔ ان کا کہنا تھا کہ سیاسی اختلافات سے ہٹ کر قومی مفاد کیلئے ہم سب متحد ہیں۔ میاں نواز شریف نے اس موقع پر کہا کہ وہ ملاقات کیلئے وقت دینے پر وزیراعظم کے مشکور ہیں ۔ یہ حکومت اور قوم کے امتحان کا وقت ہے ۔بیرون ممالک پر انحصار کی بجائے ہمیں خود آگے بڑھنا ہو گا۔ انہوں نے کہا کہ ہمارے پاس اتنے وسائل ہیںکہ ہم دوبارہ اپنے قدموں پر کھڑے ہو سکتے ہیں۔ انہوں نے کہا کہ اس مشکل وقت میں سیاسی دکان چمکانے کا سوچنا حرام ہے۔ قوم کو اکٹھا کرنے کیلئے سیاست سے بالاتر ہو کر کام کرنا ہو گا۔ میاں نواز شریف نے بتایا کہ انہوں نے وزیراعظم گیلانی کو ایک ایسی آزاد اتھارٹی بنانے کی تجویز دی تھی جس کے ذمے فنڈ ریزنگ کا کام ہو اور مجھے خوشی ہے کہ وزیراعظم نے اس تجویز کا خیر مقدم کیا ہے۔ اتھارٹی بنانے کیلئے میں نے کچھ نام وزیراعظم کو دیے ہیں جن میں رانا بھگوان داس، فخرالدین۔ جی ابراہیم، جسٹس تقی عثمانی، عبداللہ، رستم شاہ مہمند، علی احمد کرد، محمود خان اچکزئی کے نام شامل ہیں۔ ان کا کہنا تھا کہ اتھارٹی کیلئے ایک دو دن میں نام بھی تجویز کر لیا جائے گااور اس اتھارٹی میں وہی ارکان شامل کیے جائیں گے جن کے کردار پر کوئی انگلی نہ اٹھا سکے۔انہوں نے عوام سے اپیل کی کہ وہ اپنے عطیات اس باڈی کو دیں ۔ اس موقع پر صحافیوں کے سوالوں کے جواب دیتے ہوئے وزیراعظم یوسف رضا گیلانی نے کہا کہ آپ کے سامنے ماضی میں مالاکنڈ میں فوجی کاروائی کے دوران 2.5 ملین آئی ڈی پیز کو شفاف نظام کے ذریعے مدد فراہم کی گئی تھی۔ میاں نواز شریف نے کہا کہ حکومت اس سلسلے میں پہلے اپنی مثال قائم کرے گی اس کے بعد لوگوں کو حصہ لینے کیلئے کہا جائے گا۔ صدر زرداری کواس سلسلے میں اعتماد میں لینے کے حوالے سے ایک صحافی کے سوال پر وزیراعظم کا کہنا تھا کہ انہوں نے صدر زرداری کو نواز شریف سے ملاقات سے متعلق دو دن پہلے انفارم کر دیا تھا۔

__________________
جاویداسد