بیجنگ:صدرآصف علی زرداری نے کہاہے کہ پاکستان نئے منتخب امریکی صدر سے فاٹا میں آزاد تجارت اور امریکی مارکیٹ میں ان علاقوں کی مصنوعات کو ترجیح دینے کے لیے مذاکرات کرے گا۔
بیجنگ میں چین کے سرکاری اخبار سےانٹرویو میں صدرآصف علی زرداری کا کہنا تھا کہ قبائلی علاقے شدت پسندی سے زیادہ متاثر ہوئے ہیں۔ پاکستان چاہتاہے کہ امریکا ان علاقوں میں سرمایہ کاری کرےتاکہ علاقے میں خوشحالی آئے۔

صدر نے کہاکہ خطے میں سب سے بڑا مسئلہ افغانستان میں افیون کی کاشت ہے۔ کیوں کہ شدت پسند اس سے حاصل ہونی والی رقم دہشت گرد کارروایوں پر خرچ کررہے ہیں۔

صدر نے اس تاثر کو مسترد کیاکہ فاٹا میں لڑائی امریکا کے کہنے پر ہورہی ہے۔ انہوں نے کہاکہ قبائلی علاقوں میں جنگ پاکستان کی اپنی جنگ ہے۔

صدر نے کہاکہ امریکا میں صدارتی انتخاب کے بعد منتخب ہونے والے صدر سے فاٹا میں صنعتوں کے قیام میں سرمایہ کاری اور وہاں بننے والی مصنوعات کی امریکی مارکیٹ میں ترجیح کے متعلق آزاد تجارت کے معاہدے پر مذاکرات کئے جائیں گے۔