امریکی فوج ایک ایسی ویڈیو ٹیپ کی تحقیقات کر رہی ہے جس میں عراق میں تعینات ایک امریکی فوجی کو پہاڑی سے ایک چھوٹے اور اذیت سے چیختے ہوئے کتے کو پھینکتے ہوئے دکھایا گیا ہے۔
یوٹیوب پر دکھائی جانے والی یہ ویڈیو بین الاقوامی سطح پر توجہ اور امریکا کے لیے اظہار مذمت کا سبب بنی ہوئی ہے۔ یوٹیوب پر اس ویڈیو کو ایک لاکھ تیس ہزار سے زائد مرتبہ دیکھا جا چکا ہے۔



ویڈیو میں دو مسلح امریکی فوجیوں کو دکھایا گیا ہے۔ جن میں سے ایک نے کتے کو گردن سے پکڑا ہوا ہے، دونوں‌فوجی مسکرا رہے ہیں۔
ویڈیو کو دیکھنے سے اندازہ ہوتا ہے کہ کتے کی عمر آٹھ ہفتے ہوسکتی ہے۔
ویڈیو میں ایک فوجی کہتا ہے، ’’کتنا کیوٹ پپی ہے، ہے نہ!‘‘
دوسرے فوجی کو بچے کی آواز میں کہتا ہوا دیکھا گیا ہے کہ، ’’ہاں واقعی کیوٹ پپی ہے‘‘۔
جس کے بعد پہلا فوجی مڑتا ہے اور زور سے اس چھوٹے کتے کو ہوا میں اچھال کر پھینک دیتا ہے۔ کرب میں مبتلا کتے کی چیخیں اس وقت تک سنائی دیتی رہیں جب تک وہ ریگستانی پہاڑی سے پھینکے جانے کے بعد زمین سے نہیں ٹکرا جاتا۔
امریکی فوج کے ایک ترجمان کے مطابق یہ ویڈیو دیکھ کر ہمیں شدید دھچکا لگا ہے، ہم مایوس ہوئے ہیں، اور یہ اس بہترین معیار کے بالکل برعکس ہے جس کی ہم امریکی فوجیوں سے توقع کرتے ہیں۔
امریکی میرین فوج کے ترجمان میجر کرس پیرین کا کہنا ہے کہ کتا پھینکنے والے مجرم فوجی کا تعلق امریکی ریاست ہوائی سے ہے، ہم ایسی کارروائیوں کو بالکل برداشت نہیں کریں گے اور اس حوالے سے مناسب ایکشن لیا جائے گا۔