صدر زرداری نے کہا ہے کہ فوجی بغاوت کا کوئی امکان نہیں۔ جمہوری حکومت ہی موجودہ صورتحال سے نمٹ سکتی ہے۔ امریکہ کو پاکستانی عوام کے دل جیتنے کے لئے مزید اقدامات کرنے ہوں گے۔
تمام جمہوری حکمران فوجی بغاوت سے پہلے ایسے ہی بیانات دیتے ہیں جو صدر زرداری نے دیا۔ پتہ اس وقت چلتا ہے جب ٹی وی سکرین ایک دم مردہ ہو جاتی ہے اور رات بارہ بجے کے بعد ایک آواز گونجتی ہے ۔ ''میرے عزیز ہم وطنو.... جہاں تک اس بات کا تعلق ہے کہ جمہوری حکومت ہی اس صورتحال سے نمٹ سکتی ہے تو ہماری رائے میں یہ بات درست نہیں ہے ۔ موجودہ حکومت صرف نام کی حد تک جمہوری ہے ورنہ اس میں جمہوریت والی کوئی بات نہیں ہے۔ کیا شاندار جمہوریت ہے کہ ملک کے لاکھوں لوگ سیلاب میں ڈوب رہے تھے اور ملک کا صدر ملکوں ملکوں گھوم رہا تھا' اور یہ جو دل جینے والی بات ہے تو انہیں چند کروڑ ڈالروں کے عوض خریدا نہیں جاسکتا۔ امریکہ اگر کھربوں ڈالر بھی خرچ کر ڈالے تو وہ داغ نہیں دھل سکتے جو اس نے پاکستانی عوام کے دلوں پر لگائے ہیں۔ یہ پاکستان جو پچھلے دس برسوں سے ایک مستقل نحوست میں پھنسا ہوا ہے اس کا ذمہ دار صرف اور صرف امریکہ ہے جس نے ہماری معیشت' ہماری معاشرت اور ہماری سیاست کا بیڑہ غرق کرکے ہمیں بھکاری بنا کر رکھ دیا ہے۔ اب تو امریکہ کو پاکستانی حکومت سے ہر سال چھ ماہ بعد یہ دریافت کرنا چاہیے کہ اسکے خلاف نفرت میں مزید کتنا اضافہ ہوا ہے؟

__________________
جاویداسد