امریکہ نے پاکستان آرمی کے ایوی ایشن ونگ کو 25لڑاکا کوبراہیلی کاپٹروں کی ملکیت دے دی، امریکہ پاکستان سے فوجی شعبے میں بھرپور اور طویل مدت تعاون جاری رکھے گا ، امریکی سفیر ۔تفصیلی خبر:
راولپنڈی(اُردو پوائنٹ۔22اکتوبر۔2007ء)امریکہ نے پاکستان آرمی کے ایوی ایشن ونگ کو 25لڑاکا ہیلی کاپٹروں کی ملکیت دے دی ہے اور پاکستان میں امریکی سفیر این ڈبلیو پیٹر سن نے کہا ہے کہ یہ قدم امریکہ کے پاکستان سے تعاون جاری رکھنے کے عزم کا واضح اظہار ہے ہمارے فوجی امدادی پروگرام طو یل مدت ہیں  یہ پروگرام تعاون کی ٹھوس بنیادیں ہیں جن سے د و پارٹنرز اور اتحادیوں کے تعلقات مزید مستحکم ہونگے ۔ وہ پیر کو قاسم ایئر بیس پر 25بیل 412 ہیلی کاپٹروں کی منتقلی کی تقریب سے خطاب کررہی تھیں ۔اس موقع پر سیکرٹری دفاع کامران رسول اور ڈائریکٹر جنرل آرمی ایوی ایشن میجر جنرل سید تقی نصیررضوی بھی موجود تھے ۔ امریکی سفیر نے کہاکہ پاکستان آرمی ایو ی ایشن کے جوانوں نے شاندار کارکردگی کا مظاہرہ کیا ہے یہ ہمارے لئے بڑا اثاثہ ہیں جو انتہا پسندی اور دہشت گردی کے خلاف جنگ اور خطے میں امن واستحکام کے قیام میں اہم کر دار ادا کررہے ہیں ۔انہوں نے کہاکہ آج کا دن پاکستان آرمی ایوی ایشن کی تاریخ میں نئے باب کا اضافہ ہے اور اس سے امریکہ کے اس عزم کا اظہار ہوتا ہے کہ وہ پاکستان کو طویل مدت امداد جاری رکھے گا۔2004ء میں پاکستان اور امریکہ کے درمیان آرمی ایوی ایشن کی صلاحیت بڑھانے کے لئے ساڑھے 23کرڑور ڈالر کا سمجھوتہ ہوا تھا ۔جس کے پہلے مرحلے میں پاکستان نے ہیلی کاپٹر حاصل کئے ۔ اور امریکہ نے ایک مضبو ط اور مستحکم ہیلی کاپٹر فلیٹ کے قیام کے لئے وسائل تربیت اور دیگر امداد فراہم کی۔اس موقع پر امریکی سفیر نے کہاکہ آج دوسرے مرحلے کا آغاز ہے پاک آرمی کو ان ہیلی کاپٹروں کی ملکیت دی جارہی ہے ہم لڑاکا آپریشنز کے لئے پاکستان آرمی کی صلاحیت بڑھانے میں تعاون جاری رکھیں گے ۔انہوں نے کہاکہ پاکستان اور امریکہ کی مسلح افواج کے درمیان طویل تعاون کی ایک تاریخ ہے ۔ جس کا گزشتہ چھ سالوں کے دور ان فوجی پروگراموں کے لئے پانچ ارب ڈالر ز سے زائد کی فراہمی سے واضح اظہار ہوتا ہے۔سیکرٹری دفاع کامران رسول نے ہیلی کاپٹروں کی فراہمی پر امریکی حکومت کا شکریہ ادا کرتے ہوئے کہاکہ ان ہیلی کاپٹروں کی آمد سے آرمی کی آپریشنل صلاحیتوں میں اضافہ ہو گا انہوں نے مختلف منصوبوں کی تکمیل کیلئے او ڈی آر پی کی کوششوں کو سراہا ۔ڈائریکٹر جنرل آرمی ایوی ایشن میجر جنرل سید تقی نصیر رضوی نے امریکی حکام کاشکریہ ادا کرتے ہوئے امید ظاہر کی کہ مستقبل میں بھی یہ تعاون جاری رہے گا انہوں نے کوبرا گن شپ ہیلی کاپٹروں کے کردار پر روشنی ڈالی اور امید ظاہر کی کہ ان ہیلی کاپٹروں کی آمد سے دہشت گردی کی لعنت کے خلاف جنگ کو مزید موثر بنایاجاسکے گا۔

__________________