رچرڈ ہالبروک کی سفارتی کوششیں بھر اس کوشش میں تھے کہ طالبان کے ساتھ مذاکرات کا آغاز کیا جائے

امریکی صدر براک اوباما کی انتظامیہ افغانستان میں سینیئر طالبان رہنماؤں کے ساتھ براہِ راست مذاکرات کر رہی ہے۔

یہ بات سٹیو کول نے امریکی اخبار نیو یارکر میں لکھی ہے۔

نیویارکر کے تازہ شمارے میں شائع ہونے والے اپنے مضمون میں انہوں نے کہا ہے کہ امریکہ اور طالبان قیادت کے درمیان جاری مذاکرات ابھی ابتدائی نوعیت کے ہیں اور انہیں ابھی تک امن مذاکرات کا نام نہیں دیا جا سکتا۔

انہوں نے یاد دلایا کہ امریکہ اور شمالی ویتنام کے درمیان خفیہ مذاکرات کا آغاز 1968 میں ہوا تھا اور امریکہ کی براہِ راست مداخلت کے اختتام کے لیے پیرس معاہدہ 1973 میں طے پایا تھا۔

صحافی سٹیو کول کا کہنا ہے کہ پاکستان اور افغانستان کے خصوصی ایلچی رچرڈ ہالبروک نے اوباما انتظامیہ کو مشورہ دیا تھا کہ وہ طالبان سے براہِ راست مذاکرات کریں اور یہ انہیں کی سفارتی کامیابی ہے کہ ان کی تجویز منظور لی گئی اور امریکہ نہ طالبان سے براہِ راست مذاکرات کا آغاز کیا۔

انہوں نے لکھا ہے کہ بائیس اگست 1998 کو طالبان کے امیر ملا عمر نے امریکی وزارتِ خارجہ فون کیا۔ اس وقت امریکہ نے افغانستان میں موجود القاعدہ کے کیمپوں پر میزائل داغے تھے۔

ملا عمر کی درمیانی درجے کے سفارکار سے بات ہوئی۔ ملا عمر نے تجویز کیا کہ امریکی کانگریس کو چاہیے کہ وہ امریکی صدر بل کلنٹن کو مستعفی ہونے کا کہے۔ ملا عمر نے مزید کہا کہ امریکی حملے نقصان دہ ہیں اور ان حملوں کے باعث شدت پسندی میں اضافہ ہو گا نہ کہ کمی واقع ہو گی۔

امریکہ اور طالبان کے درمیان بات چیت میں ملا عمر حصہ نہیں لے رہے۔ وہ طالبان رہنماؤں کے خفیہ اجلاس میں بھی حصہ نہیں لیتے۔ اور جب وہ تقریر کرتے بھی ہیں تو وہ کیسٹ پر ریکارڈ شدہ پیغام کے ذریعے کرتے ہیں۔

اوباما انتظامیہ کی جاب سے شروع کیے گئے مذاکرات کا ایک مقصد یہ جاننا ہے کہ طالبان رہنماؤں میں سے کس درجے کے رہنما مذاکرات کرنے کے حق میں ہیں اور ان کی شرائط کیا ہیں۔

امریکہ کی کوشش ہے کہ وہ ان مذاکرات کے ذریعے کچھ طالبان رہنماؤں کو القاعدہ سے تعلقات ختم کرنے کے لیے قائل کرسکیں۔ اس کے علاوہ اس بات پر بھی قائل کرسکیں کہ ہتھیار پھینک کر سیاست میں حصہ لیں۔



‭BBC Urdu‬ - ‮آس پاس‬ - ‮امریکہ کے طالبان سے براہِ راست مذاکرات‬

__________________
محتاج اصلاح و دعا