پاکستانی فوج کے سربراہ جنرل اشفاق پرویز کیانی نےحقانی نیٹ ورک کے حوالے سے امریکی اہلکاروں کے بیانات کو بے بیناد قرار دیتے ہوئے کہا ہے کہ ایڈمرل مائیک ملن کو اچھی طرح علم ہے کہ اور کن کن ممالک کے حقانی نیٹ ورک سےتعلقات ہیں۔

جنرل اشفاق پرویز کیانی نے امریکی فوج کے کمانڈر کے بیان کے جواب میں کہا کہ مائیک ملن اچھی طرح جانتے ہیں کہ کن کن ممالک کے حقانی گروپ کے ساتھ تعلقات ہیں۔ انہوں نے کہا کہ صرف پاکستان کو موردِ الزام ٹہرانا غیر منصفانہ اور غیر سود مند ہے۔

اس سے قبل پاکستان کی وزیرِ خارجہ حنا ربانی کھر نےمتنبہ کیا ہے کہ اگر امریکہ کی جانب سے پاکستان پر شدت پسندوں کی حمایت کے الزامات لگانے کا سلسلہ جاری رہا تو وہ اپنے اس اتحادی سے ہاتھ دھو سکتا ہے۔

اقوامِ متحدہ کی جنرل اسمبلی کے سالانہ اجلاس میں شرکت کے لیے نیویارک میں موجود پاکستانی وزیرِ خارجہ نے ایک پاکستانی نجی ٹی وی کو انٹرویو دیتے ہوئے کہا کہ پاکستان اور اس کے عوام کو تنہا کرنے کی کوشش امریکہ کے مفاد میں نہیں ہے۔

ان کا یہ بیان حالیہ چند دنوں میں اعلٰی امریکی حکام کی جانب سے پاکستان پر حقانی نیٹ ورک کی حمایت کے الزامات کے بعد سامنے آنے آیا ہے۔

آپ پاکستان اور پاکستانی عوام کو تنہا کرنا برداشت نہیں کر سکتے اور اگر آپ ایسا کر رہے ہیں یا وہ ایسا کرنے کا انتخاب کرتے ہیں تو اس کی قیمت بھی وہی ادا کریں گے۔

حنا ربانی کھر کا کہنا تھا کہ ’آپ ایک اتحادی کو کھو دیں گے‘۔ انہوں نے کہا کہ ’آپ پاکستان اور پاکستانی عوام کو تنہا کرنا برداشت نہیں کر سکتے اور اگر آپ ایسا کر رہے ہیں یا وہ ایسا کرنے کا انتخاب کرتے ہیں تو اس کی قیمت بھی وہی ادا کریں گے‘۔

انہوں نے اعتراف کیا کہ پاکستان اور امریکہ کے تعلقات شدید مشکلات کا شکار ہیں۔ انہوں نے کہا کہ ’ یہ کہنا مناسب ہوگا کہ آپریشنل سطح پر(امریکہ اور پاکستان کے تعلقات میں) شدید مشکلات موجود ہیں‘۔

امریکی فوج کے اعلیٰ ترین کمانڈر ایڈمرل مائیک مولن نے جمعرات کو سینیٹ کے ارکان کو ایک بریفنگ دیتے ہوئے کہا تھا کہ کابل پر حالیہ حملوں میں ملوث شدت پسند گروہ حقانی نیٹ ورک پاکستان کی خفیہ ایجنسی آئی ایس آئی کا آلہ کار ہے۔

امریکی کمانڈر نے یہ بھی کہا تھا کہ کابل میں نیٹو اور امریکی فوج کے اڈوں پر حملے کا منصوبہ حقانی گروپ نے آئی ایس آئی کی معاونت سے تیار کیا تھا۔

ایڈمرل مولن نے پاکستان پر الزام لگاتے ہوئے کہا تھا کہ پاکستان تشدد برآمد کر رہا ہے جس سے دہشت گردی کے خلاف پاکستان اور امریکہ کے درمیان تعاون خطرے میں پڑ گیا ہے بلکہ اس سے دہشت گردی کے خلاف دس سالہ جنگ کا نتیجہ بھی ناکامی میں نکل سکتا ہے۔

ان کا یہ بھی کہنا تھا کہ مولن نے کہا کہ پاکستان کی حکومت نے تشدد کو ایک پالیسی کے تحت اختیار کیا ہے۔ انہوں نے کہا کہ پاکستان تشدد برآمد کر کے اپنی داخلی سلامتی کو خطرے میں ڈال رہا ہے اور خطے میں اپنی ساکھ کو بھی مجروح کر رہا ہے۔


پاکستانی اور امریکی وزرائے خارجہ کی ملاقات میں بھی یہ معاملہ زیرِ بحث آیا تھا

انہوں نے کہا کہ پاکستان نے بین الاقوامی سطح پر بھی اپنی ساکھ کو نقصان پہنچایا ہے اور اپنی معاشی بحالی کو بھی خطرے میں ڈال دیا ہے۔

پاکستان کی وزیرِ خارجہ کے اس بیان سے قبل پاکستانی وزیرِ داخلہ رحمان ملک نے جمعرات کو ہی بی بی سی اردو کو دیے گئے خصوصی انٹرویو میں حقانی نیٹ ورک سے پاکستانی حکام کے تعلقات کے الزامات رد کر دیے تھے۔ انہوں نے کہا تھا کہ پاکستان افغان سرحد سے جڑے علاقے میں موجود تمام شدت پسندوں کے خلاف کارروائی کرنے کے لیے پرعزم ہے۔

خیال رہے کہ امریکی سینیٹ کی ایک کمیٹی نے حال ہی میں پاکستان کے لیے ایک ارب ڈالر کی امداد کی منظوری دیتے ہوئے اسے شدت پسند گروہوں خصوصاً حقانی گروپ کے خلاف کاروائی سے مشروط کر دیا ہے۔

یہ کہنا مناسب ہوگا کہ آپریشنل سطح پر(امریکہ اور پاکستان کے تعلقات میں) شدید مشکلات موجود ہیں۔
امریکی حکام یہ بھی کہہ چکے ہیں کہ ان کا ملک اپنے مفادات کے خلاف پاکستان سے ہونے والے حملوں کو روکنے کے لیے ہر ممکن اقدام کرے گا۔ امریکی وزیر دفاع لیون پنیٹا نے حال ہی میں کہا ہے کہ حقانی نیٹ ورک کا افغانستان میں اتحادی فوجوں پر حملے کر کے واپس پاکستان چلے جانا ناقابلِ قبول ہے۔

امریکی خبر رساں ایجنسی اے پی کے مطابق لیون پنیٹا نے کہا کہ امریکہ افغانستان میں اپنی فوجوں پر پاکستان میں موجود طالبان کی جانب سے حملوں کی اجازت نہیں دے گا اور ’پیغام بہت واضح ہے کہ ہم اپنی افواج کی حفاظت کے لیے ہر ممکن اقدام کریں گے‘۔

بی بی سی اردو۔

__________________


http:// haroonazam.wordpress.com

ھارون اعظم کا بلاگ۔