امریکی انتظامیہ صدرپرویز مشرف کی حمایت نہ کرے ،مسلم لیگ ن
اسلام آباد (جنگ نیوز )پاکستان مسلم لیگ (ن) نے امریکی انتظامیہ سے کہا ہے کہ وہ پاکستان کے صدر جنرل (ر) پرویز مشرف کی حمایت کی پالیسی پر نظر ثانی کرتے ہوئے ان کی حمایت نہ کریں۔ پاکستان کی حکومت سازی اور ججز و عدلیہ کی بحالی کے معاملات پاکستانی عوام کے ایشوز ہیں، ہم پاکستانی حکومت سازی، داخلی یا سیاسی معاملات میں مداخلت پسند نہیں کرتے۔ یہ رد عمل ا سٹیٹ ڈپارٹمنٹ کے اس بیان کے بعد سامنے آیا جس میں کہا گیا تھا کہ واشنگٹن کو امید ہے کہ وہ پاکستان کے صدر پرویز مشرف کے ساتھ کام کرتے رہیں گے۔ مسلم لیگ ن کے مرکزی سیکرٹری اطلاعات احسن اقبال نے کہا کہ اگر امریکا یا کسی اور ملک نے پاکستان کے صدر جنرل (ر) پرویز مشرف کو مسلط رکھنے کی کوشش کی تو اس سے یہ مراد لی جائے گی کہ پاکستانی عوام کی امنگیں ان ممالک کے لیے کوئی معنی نہیں رکھتیں۔

__________________