امریکی حملے برداشت نہیں، ملکی سالمیت پر کوئی سمجھوتہ نہیں کیا جائیگا، صدر ، وزیراعظم اور آرمی چیف میں اتفاق
اسلام آباد (پاک ڈاٹ نیٹ) حکومت اور عسکری قیادت نے دہشت گردی کیخلاف جنگ اور قبائلی علاقوں پر امریکی حملوں کے حوالے سے مشترکہ حکمت عملی اپنانے پر اتفاق کرتے ہوئے ایک بار پھر کہا ہے کہامریکی حملے کسی صورت برداشت نہیں کئے جائینگے اور دہشت گردی کیخلاف جنگ میں ملکی سالمیت اور خود مختاری کا دفاع کیا جائیگا، اور اس سلسلے میں کوئی سمجھوتہ نہیں کیا جائیگا۔ یہ فیصلہ جمعہ کے روز یہاں ایوان صدر اسلام آباد میں صدر آصف علی زرداری ، وزیراعظم سید یوسف رضا گیلانی اور آرمی چیف جنرل اشفاق پرویز کیانی کے درمیان ملاقات میں کیا گیا۔ ملاقات میں ملک کی مجموعی صورتحال ، پاک افغان سرحدی صورتحال، قبائلی علاقوں پر امریکی حملوں سمیت اہم امور پر تبادلہ خیال کیا گیا۔ ایک نجی ٹی وی چینل کی رپورٹ کے مطابق ملاقات میں امریکی حملوں کی صورت میں حکومت اور فوج کا مشترکہ حکمت عملی اپنانے پر اتفاق کیا گیا۔ ملاقات میں صدر و وزیراعظم اورا ٓرمی چیف کے اس بات پر اتفاق کیا کہ امریکی حملے کسی صورت برداشت نہیں کیئے جائینگے اور ملکی خود مختاری پر کوئی سمجھوتہ نہیں کیا جائیگا۔ ذرائع کے مطابق ایوان صدر میں آصف علی زرداری کی طرف سے دیئے گئے افطار ڈنر میں صدر و وزیراعظم اور آرمی چیف کے درمیان غیر رسمی مشاورت ہوئی جس کا ایجنڈہ صدر آصف علی زرداری کا پارلیمنٹ کے مشترکہ اجلاس سے خطاب اور امریکی حملوں پر غور کرنا تھا۔ ملاقات میں صدر کے دورہ برطانیہ آرمی چیف کے دورہ چین اور آئندہ صدر کا دورہ امریکہ پر تفصیلی مشاورت کی گئی ۔ ذرائع کے مطابق اس موقع پر سویلین حکومت اور فوجی قیادت کے درمیان مکمل طور پر اس بات پر اتفاق کیا گیا کہ پاکستان کی سالمیت ، دفاع اور خود مختاری پر کسی قسم کا سمجھوتہ نہیں کیا جائیگا اور اس حوالے سے نہ صرف امریکہ بلکہ دیگر اتحادی ملکوں کو بھی اس بات پر قائل کرنے کی کوشش کی جائیگی کہ پاکستان کی خودمختاری کا مکمل احترام کیا جائے اور آئندہ دورہ امریکہ کے دوران صدر آصف علی زرداری امریکی قیادت کو اس حوالے سے قائل کرنے کی کوشش کرینگے۔ اس موقع پر یہ بھی طے پایا ہے کہ صدر آصف زرداری کے پارلیمنٹ کے مشترکہ اجلاس سے خطاب کے دوران عوام کو مہنگائی کے درپیش مسائل ، صدارتی اختیارات اور دیگر مسائل کے حوالے سے صدر اپنے پالیسی بیان میں اہم اعلانات کرینگے۔