امریکی صدارتی انتخابی مہم،ریاست آئیوا میں اومہ باکی ڈیموکریٹک اور ہکابی کی ری پبلیکن پارٹی میں برتری



واشنگٹن (جنگ نیوز )امریکا میں 2008ء کے صدارتی انتخابات کے لیے آئیوا میں ہونے والے پہلے پارٹی اجتماع میں باراک اوبامہ نے ڈیموکریٹ اور مائیک ہکابی نے ریپبلکن پارٹی کے صدارتی امیدواران پر برتری حاصل کرلی ہے۔آئیوا میں ڈیموکریٹ اور ریپبلکن پارٹی کے صدارتی امیدوار نامزد کرنے کے لیے دنوں جماعتوں کے اراکین کے اجتماعات ہوئے۔ ڈیموکریٹ پارٹی کے کاکسز اجتماع میں اوبامہ نے ہیلری کلنٹن اور جان ایڈورڈ پر ایک سخت مقابلے کے بعد برتری حاصل کی۔ جبکہ مائیک ہکابی نے ریپبلکن پارٹی کیاجتماع میں مٹ رومنی کو پیچھے چھوڑ دیا۔ آئیوا میں حاصل ہونے والی برتری ان دونوں امیدوارں کے لیے آگے چل کر بہت فائدہ مند ثابت ہو سکتی ہے۔ رپبلکن اراکین کے ایک ہزار سات سو اسی اجتماعات میں سے اسی فیصد اجمتاعات کے نتائج کے مطابق ہکابی نے چونتیس فیصد ووٹ حاصل کیئے۔ ہکابی ماضی میں ارکنساس کے گورنر رہ چکے ہیں۔ان کے مد مقابل رومنی پچیس فیصد اراکین کی حمایت حاصل کر سکے۔ڈیموکریٹ پارٹی کے اجتماعات میں اوبامہ نے اڑتیس فیصد ووٹ حاصل کیئے جبکہ ان کے مدمقابل امیدوارہیلری کلنٹن اور ایڈورڈ نے بالترتیب انتیس اور تیس فیصد ووٹ حاصل کیئے۔ان جماعتوں کے اندر صدارتی امیدوار کی نامزدگی کا اگلا مقابلہ اب منگل کو نیو ہیمپشائر کی ریاست میں ہوگا۔باراک اوبامہ کی انتخابی حکمت عملی تیار کرنے والے ڈیوڈ ایکسلراڈ نے کہا کہ ان کے خیال میں لوگ تبدیلی کو ترس رہے ہیں۔دوسری جانب بش حکومت کے ترجمان کا کہنا ہے کہ صدر بش کی ہمدردیاں جیتنے اور ہارنے والے امیدواروں کے ساتھ ہیں۔