پاکستان کے وزیر دفاع احمد مختار نے کہا ہے جب تک امریکہ معافی نہیں مانگتا اس کے ٹرکوں اور کنٹینرز کو پاکستان سے نہیں گزرنے دیا جائے گا۔ انہوں نے کہا معافی مانگی گئی تو اس پر غور کیا جائے گا۔
صحافیوں کی جانب سے پوچھے گئے سوال پر کہ معافی مانگے جانے کی صورت میں پاکستان کا رویہ کیا ہوگا، وزیر دفاع نے کہا کہ جب تک امریکہ معافی نہیں مانگتا اس کے ٹرکوں اور کنٹینرز کو پاکستان سے گزرنے نہیں دیا جائے گا۔
احمد مختار نے کہا:’یہ اپنا دوسرا راستہ ڈھونڈیں تو انہیں کیا ملتا ہے، پہاڑیاں ملتی ہیں جن پر ابھی بھی برف جمی ہوئی ہے۔ یہ لوگ وہ راستہ استعمال نہیں کر سکتے اور پھر ہمارے پاس ہی آئیں گے۔ یہ ان کی مجبوری ہے اور جب یہ معافی مانگیں گے تو تب ہم ان کو معاف کریں گےعوام کی اجازت سے۔‘
اس سے قبل پاکستان کی وزیر خارجہ حنا ربانی کھر نے کہا ہے کہ اب امریکہ سے جو بھی تعاون ہوگا وہ تحریری اور اصولوں کی بنیاد پر ہوگا اور اگر امریکہ یا نیٹو نے دوبارہ مہمند حملے جیسی کارروائی کی تو ان کے ساتھ پر تعاون پر نظر ثانی کی جائے گی۔
پاکستان کی پارلیمنٹ کے ایوان بالا کی قائمہ کمیٹی برائے خارجہ امور کے سامنے بیان دیتے ہوئے حنا ربانی کھر نے کہا کہ ’خون فوجی کا ہو یا سویلین کا، خون خون ہی ہے اور ہمارے فوجی کا خون بھی اتنا ہے قیمتی ہے جتنا نیٹو یا امریکہ کے فوجی کا۔‘
انہوں نے کہا کہ جب تک امریکہ ڈرون حملے نہیں روکتا، ہماری خود مختاری اور سلامتی کی ضمانت نہیں دیتا ہمارے لیے ان کا ساتھ دینا مشکل ہوگا۔
پاکستانی پارلیمنٹ کے ایوان بالا کی کمیٹی کے سامنے یہ بیان انہوں نے کمیٹی کے اجلاس کے دوران مہمند ایجنسی میں نیٹو افواج کی جانب سے پاکستانی فوجی چوکی پر حملے کے بارے میں ارکان کے سوالوں کے جواب دیتے ہوئے دیا۔
کمیٹی کے سربراہ سلیم سیف اللہ خان اور ارکان سینیٹر پرفیسر خورشید احمد، عباس خان، ایس ایم ظفر، اسلام الدین شیخ، جہانگیر بدر اور نیر بخاری کے مختلف سوالوں کے جواب میں وزیر خارجہ کا کہنا تھا کہ ’اب بہت ہوگیا، یہ کوئی پہلا حملہ نہیں تھا۔‘
وزیر خارجہ کے مطابق نیٹو نے اتحادی ہوتے ہوئے اپنے اتحادی پر آٹھ حملے کیے جن میں بہتّر سیکیورٹی اہلکار ہلاک اور دو سو ستاون زخمی ہوئے۔
وزیر خارجہ نے کہا کہ ’مہمند ایجنسی کا واقعہ کسی صورت قابل قبول نہیں اس پر ہم خاموش نہیں بیٹھ سکتے۔ نیٹو نے ریڈ لائن کراس کی تو پھر ہم نے بھی فیصلہ کیا ہے کہ اب امریکہ اور اس کے اتحادیوں کے ساتھ تعاون کی تمام شرائط پر نظر ثانی ہو گی، اس پر کام جاری ہے اب امریکہ سے جو بھی تعاون ہوگا وہ تحریری اور اصولوں کی بنیاد پر ہوگا۔‘
صحافی ظفر ملک کے مطابق کمیٹی کے سربراہ سلیم سیف اللہ خان نے اجلاس کے حوالے سے کہا کہ اس واقعے کےاثرات دور رس ہوں گے اور اگر کسی کا خیال ہے کہ اگلے ہفتے نیٹو کنٹینر سروس بحال ہو جائے گی یا پھر شمسی بیس پر سرگرمی شروع ہو جائے گی تو اب ایسا نہیں ہو گا۔
انہوں نے کہا کہ کمیٹی کے ارکان میں اس حوالے سے اتفاقِ رائے پایا گیا کہ پاکستان کو سخت ترین موقف برقرار رکھنا چاہیے۔

ح

__________________
اے ایمان والو اللّٰہ سے ڈرو اور اسکی طرف وسیلہ ڈھونڈو (جس کی بدولت تمہیں اس کا قُرب حاصل ہو ) اور اس کی راہ میں جہاد کرو اس امید پر کہ فلاح پاؤ (المائدہ 35)