لاہور : پاکستان میں تحریک انصاف کے چیئرمین عمران خان کے جلسے نے جہاں سیاسی حلقوں کو ششدر کیا وہیں امریکہ میں بھی اس کے چرچے سننے میں آرہے ہیں۔
امریکی میڈیا نے عمران خان کے جلسے کو پاکستان میں سیاسی تبدیلی کی جانب پہلا قدم قرار دیا ہے۔
واشنگٹن پوسٹ کے مطابق کرکٹ سے سیاست کے میدان میں آنے والے عمران خان کا لاہور میں جلسہ ایک حیرت انگیز شو تھا جس سے حکومت مخالف احتجاج میں شدت آسکتی ہے۔
اخبار کے مطابق لوگوں کی تعداد ایک لاکھ ہو یا اس سے زیادہ مگر اس سے معلوم ہوتا ہے کہ عمران خان شہری نوجوانوں میں مقبولیت حاصل کرچکے ہیں اور اس جلسے نے پاکستان کے ان تجزیہ کاروں کو سکتے میں ڈال دیا ہے جن کے خیال میں تحریک انصاف ایک شخص کے گرد ہی گھومتی ہے۔
اخبار کے مطابق جمعے کو مسلم لیگ ن کی ریلی ہو یا اتوار کی دوپہر کراچی میں حکومتی اتحادی متحدہ قومی موومنٹ کی ریلی، دونوں ریلیاں عمران خان کے جلسے جیسی پرجوش نہیں تھی۔
واشنگٹن پوسٹ کے مطابق عمران خان کے نوجوان پارٹی ورکر اپنے قائد کا پیغام سماجی رابطوں کی ویب سائٹس کے ساتھ بھی پھیلا رہے ہیں، اور ریلی کی لمحہ بہ لمحہ کوریج ٹوئیٹر پر کی گئی۔
نیویارک ٹائمز کا کہنا ہے کہ لاہور میں عمران خان کا حکومت مخالف جلسہ بہت بڑی تعداد کو اپنی جانب متوجہ کرنے میں کامیاب رہا۔
اخبار کے مطابق اس جلسے سے ظاہر ہوتا ہے کہ عمران خان حکومتی جماعت پاکستان پیپلزپارٹی اور اس کی روایتی حریف مسلم لیگ ن کے خلاف سنجیدہ چیلینج بن کر ابھر رہے ہیں۔
اخبار کا کہنا ہے کہ لاہور کے جلسے میں لوگوں کی تعداد نے وہاں کی مضبوط جماعت مسلم لیگ ن کو حیران جبکہ سیاسی تجزیہ کاروں کو متاثر کیا ہے۔
نیویارک ٹائمز نے لاہور کے جلسے کی فضاءکو بجلی کا جھٹکا قرار دیا ہے جہاں متعدد معروف گلوکار ہجوم کو محظوظ کرتے رہے۔

__________________
تم لوگوں کی اس دنیا میں ہر قدم پہ انساں غلط
میں صحیح سمجھ کہ جوبھی کروں تم کہتے ہو غلط
میں غلط ہوں تو پھر کون صحیح؟