امسال حج کا دورانیہ 30 دن:عازمین حج کومقدس فریضے سے روکنے کے مترادف ہے، مفتی نعیم

کراچی، وفاقی وزارت مذہبی امورکی جانب سے امسال حج کا دورانیہ تیس دن کرنا عازمین حج کو مقدس فریضے سے روکنے کے مترادف ہے، حج پر جانے کے خواہش مندوں پر سرزمین حرمین پر تیس دن گزارنے کی لازمی شرط عائد کی گئی ہے، وزارت مذہبی امور کے ناروا شرط کی وجہ سے ملازمت پیشہ وکاروباری حضرات لمبی چھٹی نہ ملنے اور چھوٹے بال بچے دار سیکڑوں ادائیگی فریضہ حج کے عازمین سعادت حج سے محروم رہ جائینگے، ناقص پالیسی کی وجہ سے کسی کا فرض عین چھوٹ جانے کا گناہ گاروذمہ دار کون ہوگا؟ سپریم کورٹ سمیت صدر پاکستان جناب آصف علی زرداری اور وزیراعظم سید یوسف رضا گیلانی معاملے کا فوری نوٹس لیتے ہوئے 30 دن کی شرط کوفی الفور ختم کرائیں۔ ان خیالات کا اظہار جا معہ بنوریہ عالمیہ کے مہتمم وشیخ الحدیث مفتی محمد نعیم نے منگل کو مختلف نجی ٹریول ایجنسیوں کے مالکان اور نمائندوں سے ملاقات کے بعد اپنے بیان میں کیا۔ اس موقع پر ٹریول ایجنسیوں کے مالکان نے سال2011 میں حج کے لئے وزارت مذہبی امورکے حج پالیسی، کئے جانے والے اقدامات، ٹریول ایجنسیوں کے حوالے حکومتی پالیسی، وزارت مذہبی امورکے کچھ اعلیٰ افسران کے مبینہ گھپلوں اور شکایات سے آگاہ کیا اور بتایا کہ سیکڑوں عازمین حج نے مذکورہ تیس دن کے لازمی شرط کی وجہ سے اپنے حج ٹوورز آپریٹر سے اپنی بکنگ کینسل کر رہے ہیں جبکہ ہزاروں دیگر گومگو کی کیفیت اور پریشانی کا شکار ہیں۔ مفتی محمد نعیم نے افسوس کا اظہارکرتے ہوئے کہا کہ ہماری حکومتوں نے حج وعمرے جیسے مقدس فریضے کو بھی کمائی کا ذریعہ بنا لیا ہے، حج سیزن کے موقعوں پر ہم نے بھی ہر سال بارہا اعلیٰ حکام کوحج کرپشن وگھپلوںسے آگاہ کیا لیکن ہماری تجاویز پرعمل نہیں کیا گیا اور اب اس کے نتائج سامنے ہیں کہ سابق وزیر مذہبی امور ایف آئی اے کسٹڈی میںہیں لیکن حقیقی مجرم اور ہیں جن کو بچانے کےلئے سابق وزیرکو قربانی کا بکرا بنانے کی سازشیں ہو رہی ہیں۔

انہوں نے وزارت مذہبی امورکو تنقیدکا نشانہ بناتے ہوئے کہا کہ وزارت مذہبی امورکی امسال حج پالیسی ناقص ہونے کے ساتھ مشکوک بھی ہے اور عازمین حج پرسرزمین حرمین شریفین پر30 دن لازمی گزارنے کی شرط عائد کرنا سمجھ سے بالاتر ہے کیونکہ ملازمت پیشہ وکاروباری حضرات لمبی چھٹی نہ ملنے اور چھوٹے بال بچے دار سیکڑو ں فریضہ حج کے خواہش مند حضرات کرایہ کی مد میں اضافی رقم دے کر ایئرلائن سے ٹکٹ خریدتے ہیں تاکہ کم وقت اور تمام تر مجبوریوںکے باوجود فرض عین کی ادائیگی چاہتا ہے اس لئے وزارت مذہبی امورکی جانب سے 30 دن کی شرط عازمین کو حج کو فریضہ مقدس کی ادائیگی سے روکنے کے مترادف ہے۔ انہوں نے مزید کہا کہ گزشتہ سالوں میں حاجیوں کو بہترین سہولیات فراہم کرنے والی نجی ٹریول ایجنسیوں کو شاندار کاکردگی کی وجہ سے سرکاری احکامات کی بنیادپرملنے والا اضافی حج کوٹے کا حق بھی رشوت، سفارشی اور اقرباءپروری کی نظر ہو رہا ہے اور اس میں وزارت مذہبی امورکے کچھ اعلی افسران ہیں، جبکہ کلیئر قرار دی جانے والی ٹریول ایجنسیوں سے رشوت بھی مانگی جا رہی ہے۔ مفتی محمد نعیم نے سپریم کورٹ، صدر پاکستان اور وزیر اعظم سے مطالبہ کیا کہ ان معاملات کا نوٹس لیں کیونکہ اس سے ملک بھر میںمختلف ٹریول ایجنسیوں کے ذریعے فریضئہ حج کے خواہش مند ہزاروں عازمین حج گومگو کی کیفیت میں ہیںاورکالی بھیڑیں ملک اور حکومت کےلئے ایک بار پھر بدنامی کا باعث بن رہے ہیں۔
karachiupdates.com

__________________
لا فتی الا علیّ لا سیف الاّ ذوالفقار