امن و امان کی صورتحال نئی حکومت کے لیے چیلنج ہے، تحریک منہاج القرآن
کراچی (پ ر) امیر تحریک منہاج القرآن علامہ قیصر اقبال قادری، سینئر نائب امیر سید ظفر اقبال، ناظم تحریک اطہر جاوید صدیقی، الیاس مغل نے گزشتہ روز شہر میں پر تشدد کاررائیوں میں پانچ وکلا سمیت 12 افراد کی ہلاکتیں قومی عوامی املاک کو نقصان پہنچانے کے واقعات کی سخت مذمت کرتے ہوئے کہا ہے کہ پاکستان دشمن نادیدہ قوتیں ایک مرتبہ پھر ملک کے حالات خراب کرنے کے لیے منظم پلان کے تحت کارروائیاں کرنے میں مصروف عمل ہیں جبکہ قانون نافذ کرنے والے ادارے خاموش تماشائیوں کا کردار ادا کر رہے ہیں ملک دشمن دہشت گرد عناصر کھلے عام بے گناہ افراد کو تشدد کا نشانہ بناتے رہے اور قومی سرکاری املاک کو نقصان پہنچاتے رہے ان کو روکنے والا کوئی نظر نہیں آیا ملک میں جنگل کا قانون چل رہا ہے قوم ہر لحاظ سے عدم تحفظ کا شکار ہے ان رہنماؤں ن کہا کہ سانحہ نشتر پارک سے لے کر 12/ مئی جیسے واقعات میں ملوث افراد گرفتار ہوتے تو ایسے واقعات دوبارہ رونما نہ ہوتے۔ انہوں نے کہا کہ منظم سازش کے تحت شہر کے حالات بگاڑے جا رہے ہیں اور خوف و ہراس پیدا کیا جارہا ہے دوبارہ بگڑتی ہوئی امن و امان کی صورتحال نئی حکومت کے لیے کھلا چیلنج ہے ان رہنماؤں نے کہا تمام سیاسی جماعتیں جمہوریت کے تحت صبر و تحمل کا مظاہرہ کرتے ہوئے افہام و تفہیم سے اختلافات کا حل نکالیں۔

__________________