سوات میں امن کی بحالی اور حکومتی رٹ قائم کرنے کیلئے نیم فوجی دستے تعینات کر دیئے گئے ہیں اور کئی اہم شاہراہیں آمدورفت کیلئے بند کر دی گئی ہیں جبکہ تعلیمی ادارے اور بنک بھی بند کر دیئے گئے ہیں۔ 2500 فوجیوں نے فضاگٹ، منگلور، چار باغ، خورزہ خیل، کہل، کانجو اور مٹہ سمیت مختلف علاقوں میں پوزیشنیں سنبھال لی ہیں۔ ادھر مولانا فضل اللہ اور انکے ساتھیوں نے بھی مورچہ بندی شروع کردی ہے ۔ پاک فوج کے ترجمان میجر جنرل وحید ارشد نے سوات میں سیکورٹی فورسز کی تعیناتی کی تصدیق کرتے ہوئے کہا ہے کہ سوات میں 2500 کے قریب فوجیوں کو تعینات کیا جا رہا ہے جس کی درخواست مقامی انتظامیہ نے وفاقی حکومت سے کی تھی۔ سیکورٹی فورسز کی تعیناتی کا مقصد علاقے میں امن وامان کی صورتحال کو بہتر بنانا اور لوگوں کو مولانا فضل اللہ کے ساتھیوں سے نجات دلانا ہے۔ سیکورٹی فورسز نے تمام علاقوں کو کنٹرول میں لے لیا ہے۔ سوات کی تمام اہم شاہراہوں پر ٹریفک اور عوام کی آمد و رفت بند کر دی گئی ہے جس کے باعث لوگ گھروں تک محدود ہو گئے ہیں۔مینگورہ شہر کے علاوہ اس کے مضافاتی علاقوں میں تجارتی مراکز بھی بند ہیں اور علاقے میں گن شپ ہیلی کاپٹر وقفے وقفے سے پروازیں کر رہے ہیں جس کے باعث لوگوں میں شدید خوف و ہراس پایا جا رہا ہے۔ مولانا فضل اللہ اور اس کے حامیوں کے خلاف کارروائی عمل میں لانے کے لئے بھی تیاریاں کی جا رہی ہیں اور فضل اللہ کے آبائی علاقے امام ڈھیری اور اس کے اردگرد کے علاقوں کی ناکہ بندی کر کے خارجی و داخلی راستوں کو بند کر دیا گیا ہے

بشکریہ
جنگ

__________________