انتخابات پاکستان میں نئی جمہوری پیشرفت کیلئے بنیاد فراہم کرتے ہیں،یور پی یونین
اسلام آباد(رضاچوہدری ۔۔نمائندہ جنگ،اے پی پی) یورپی یونین نے کہا ہے کہ 18 فروری کے انتخابات پاکستان میں ایک نئی جمہوری پیشرفت کیلئے بنیادفراہم کرتے ہیں۔یورپی یونین کے موجودہ صدر ملک سلوینیا کی جانب سے پیر کواسلام آباد میں فرانسیسی سفارتخانے سے جاری اعلامیہ میں18 فروری کے عام انتخابات کاخیر مقدم کرتے ہوئے جمہوری پیشرفت کیلئے اپنے عزم کے اظہار اور انتہاپسند قوتوں کومستردکرنے پر پاکستانی عوام کو مبارکباد دی گئی ہے۔اعلامیہ میں اس توقع کا اظہار کیاہے کہ ایک مستحکم اور فعال حکومت کی تشکیل کیلئے تیزی سے قدم اٹھایا جائے گاجو پاکستان کو درپیش بنیادی مسائل جیسے جمہوری نظام کی مضبوطی ، ایک آزاد عدلیہ کی دوبارہ تشکیل،انسانی حقوق اور بنیادی آزادیوں کا احترام اور علاقائی امن واستحکام سے متعلق معاملات پر توجہ دے سکے۔ یورپی یونین نے اس امر پر افسوس کا اظہار کیا کہ ججوں اور وکلاء سمیت تمام سیاسی قیدیوں کو رہا نہیں کیا گیا اور اس طرح انتخابی عمل میں حصہ لینے سے روکا گیا ۔

__________________