اسلام آباد........نگراں وزیر داخلہ لیفٹیننٹ جنرل ریٹائرڈ حامد نواز نے کہا ہے کہ عام انتخابات کے لئے ملک میں امن و امان کا ساز گار ماحول موجود ہے اور سوات جیسے علاقوں میں بھی الیکشن منعقد ہوں گے۔اسلام آباد میں شکر پڑیاں کے قریب نئے تعمیر ہونے والے پریڈ گراؤنڈ کے معائنے کے موقع پر میڈیا سے گفتگو میں وزیر داخلہ نے کہا کہ سوات میں حالات بہتر ہورہے ہیں ، انتخابی امیدوار بھی کھڑے ہوگئے ہیں ۔ نگران وزیر داخلہ نے کہا کہ سوات کے مزید معاملات کو الیکشن کمیشن دیکھ رہا ہے ، وہاں کی انتظامیہ بھی موثر ہورہی ہے ، اس لئے وہاں الیکشن منعقد ہوں گے ۔ انتخابی سرگرمیوں میں خود کش حملوں کے خطرات کے سوال پر انہوں نے کہا ایسے حملے روکنا مشکل کام ہوتا ہے، تاہم سیاسی جماعتیں، عوام اور سب الرٹ رہیں تو ان کے خطرات کو کم سے کم کیا جاسکتا ہے ۔ وزیر داخلہ نے بتایا کہ شکرپڑیاں کے قریب پریڈ گراؤنڈ کی تیاری آئندہ23 مارچ سے قبل کر لی جائے گی اور یوم دفاع کی پریڈ وہاں ہوگی ۔