انتخابات کیلئے پر امن ماحول ضروری ہے،صدر پرویز



اسلام آباد (ایجنسیاں)صدرپرویز مشرف نے کہاہے کہ نگران حکومت امن وامان کیلئے تمام وسائل استعمال کرے، صدر پرویزمشرف نے کہا کہ عام انتخابات کا صاف اور شفاف ہونا ہی کافی نہیں بلکہ ان کا پرامن ماحول میں ہونا بہت ضروری ہے تاکہ عوام بلاخوف و خطر اپنے ووٹ کا حق استعمال کرسکیں۔ان خیالات کااظہارانہوں نے گزشتہ روز صدارتی کیمپ آفس راولپنڈی میں نگران وزیراعظم محمد میاں سومرو سے گفتگوکرتے ہوئے کیا۔نگران وزیراعظم نے صدر پرویزمشرف سے ملاقات اور ان سے ملک کی مجموعی صورتحال، آئندہ انتخابات اور امن و امان سے متعلق امور پر تبادلہ خیال کیا،آن لائن کے مطابق ایوان صدر کے ذرائع کے مطابق صدر نے کہا کہ وہ جمہوریت کے فروغ پر قائم ہیں اور امید کرتے ہیں کہ جلد اس بحرانی صورتحال سے نکل جائیں گے جو کہ بے نظیر بھٹو کی شہادت کے بعد پیدا ہوئی۔ امن وامان کا قیام حکومت کی اولین ترجیح ہے۔ نگران حکومت اس کے لئے کوئی دقیقہ فروگزاشت نہ کر بلکہ تمام تر وسائل بروئے کار لائے جائیں۔ عوام کے جان و مال کے تحفظ پر کوئی سمجھوتہ نہیں کیا جا سکتا اور یہ بات خوش آئند ہے کہ سندھ میں ملک کے مختلف حصوں میں رینجرز اور فوج کے جانے سے حالات میں تیزی سے بہتری آئی ہے اور زندگی بھی معمول پر آ رہی ہے۔شرپسند عناصر ملک کے خیر خواہ نہیں جو لوگ توڑ پھوڑ اور جلاؤ گھیراؤ میں ملوث ہیں ان کے خلاف سخت کارروائی ہونی چاہئے۔ ذرائع نے بتایا کہ ملاقات میں صدر پرویز مشرف کے آج قوم سے خطاب کے حوالے سے بھی مشاورت کی گئی جبکہ بے نظیر بھٹو کے قتل کی تحقیقات کے معاملے پر بھی بات ہوئی اور اس بات پر بھی غور کیا گیا کہ تحقیقات کے دوران کس مرحلے پر غیرملکی ماہرین کی مدد حاصل کی جا سکتی ہے۔ نگران وزیراعظم نے صدر کو انتخابات کے حوالے سے مختلف سیاسی جماعتوں کے رہنماؤں کے ساتھ اپنے رابطوں اور بات چیت کے بارے میں اعتماد میں لیا۔