انتخابات کی تاریخ میں توسیع،سیاسی جماعتوں کی جانب سے انتخابی سرگرمیاں محدود



میرپورخاص (نامہ نگار) الیکشن کمیشن آف پاکستان کی جانب سے ملک میں 8 جنوری کو ہونے والے عام انتخابات کی تاریخ میں 18 فروری تک توسیع کیے جانے کے باوجود میرپورخاص ضلع میں کسی بھی سیاسی جماعت کی جانب سے باضابطہ انتخابی مہم شروع نہیں ہوسکی ہے میرپورخاص ضلع میں قومی اسمبلی کی دو اور صوبائی اسمبلی کی چار نشستیں ہیں جس پر مجموعی طور پر 103 امیدوار انتخابات میں حصہ لے رہے ہیں ان امیدواروں کا تعلق پیپلز پارٹی، متحدہ قومی موومنٹ، مسلم لیگ (ق)، مسلم لیگ (ف)، مسلم لیگ (ن)، ایم ایم اے، مزدور کسان پارٹی سے ہے، سابق وزیراعظم محترمہ بے نظیر بھٹو کی اچانک شہادت کے بعد 27 دسمبر سے تمام اداروں نے اپنی انتخابی سرگرمیاں معطل کر دی تھیں اور بدھ 2 جنوری کو الیکشن کمیشن آف پاکستان کی جانب سے انتخابات کی تاریخ میں توسیع کے باوجود میرپورخاص ضلع میں تاحال دوبارہ انتخابی سرگرمیاں بحال نہیں ہو سکی ہیں انتخابات میں حصہ لینے والے بعض امیدوار کراچی چلے گئے ہیں بعض امیدواروں کے قریبی حلقوں نے جنگ کو بتایا کہ 8 جنوری کو پولنگ ہونے کے حوالے سے ان کے امیدوار اب تک انتخابی مہم کے دوران کافی اخراجات کر چکے ہیں اور اب ان میں مزید تقریباً دو ماہ تک انتخابی مہم چلانے کی سکت نہیں رہی جس کی وجہ سے وہ خاصے پریشان ہیں تاہم امیدواروں کی اکثریت انتخابات کی توسیع سے مطمئن ہے۔