انتخابات 6 ہفتوں کیلئے ملتوی کرنے کا فیصلہ



اسلام آباد( طاہر خلیل/ نمائندہ جنگ) سیاسی جماعتوں سے مشاورت کے نتیجے میں قومی اور صوبائی اسمبلیوں کے انتخابات چھ ہفتے تک ملتوی کرنے کا اصولی فیصلہ کیا گیا ہے۔ الیکشن کمیشن آج فیصلے کا اعلان کرے گا ، پیپلز پارٹی اور نواز لیگ نے التواء کی تجویز مسترد کر دی ہے ۔اسلام آباد میں مصدقہ ذرائع نے بتایا ہے کہ الیکشن کمیشن اور حکومت کے سینئر عہدیداروں نے منگل کو ملک کی مختلف سیاسی جماعتوں کے رہنماؤں سے رابطے کئے اور انہیں محترمہ بے نظیر بھٹو کی المناک موت کے بعد پیدا شدہ امن و امان کی صورت حال اور خاص طور پر سندھ کے 11اضلاع میں انتخابی ریکارڈ نذر آتش کرنے سے متعلق صوبائی حکومت کی رپورٹ سے آگاہ کیا اور بتایا کہ انتخابات کا مختصر دورانیے کیلئے التواء ناگزیر ضروریات کو پورا کرنے کیلئے ہے تا کہ اس عرصے میں الیکشن کمیشن انتخابات کیلئے دوبارہ تیاری کرسکے اور جہاں انتخابی ریکارڈ ضائع کیا گیا ہے وہاں نیا انتخابی میٹریل فراہم کیا جاسکے۔ ذرائع نے بتایا کہ صدر پرویز مشرف اور نگران وزیراعظم محمد میاں سومرو نے بھی اس ضمن میں قابل ذکر سیاسی جماعتوں کے سربراہوں سے ٹیلی فون پر بات چیت کی ہے ۔ذرائع نے مزید بتایا کہ پاکستان مسلم لیگ ( قائد اعظم ) کے صدر چوہدری شجاعت حسین کی سربراہی میں ایک وفد جس میں مسلم لیگ سندھ کے صدر ارباب غلام رحیم اور سینیٹر مشاہد حسین سید شامل تھے، نے منگل کی شام نگراں وزیراعظم محمد میاں سومرو سے ملاقات کی اور سندھ میں مسلم لیگی رہنماؤں کی املاک کو نقصان پہنچانے اور دیگر قومی تنصیبات کی تباہی کے بارے میں ایک رپورٹ پیش کی بعد میں نگراں وزیراعظم نے راولپنڈی میں صدر پرویز مشرف سے ملاقات کی اور صورتحال پر تبادلہ خیال کیا ۔ ذرائع نے یہ بھی بتایا ہے کہ صدر پرویز مشرف آج رات اپنے خطاب میں محترمہ بے نظیر بھٹو کی اندوہناک موت، امن و امان کی صورتحال اور انتخابات کے حوالے سے قوم کو اعتماد میں لیں گے ،ذرائع کے مطابق پاکستان مسلم لیگ ( قائد اعظم ) جمعیت علمائے اسلام ( فضل الرحمن )، عوامی نیشنل پارٹی، پی پی پی ( شیر پاؤ)، مسلم لیگ ( فنکشنل )، ایم کیو ایم سمیت بعض دیگر جماعتوں نے مشاورت کے دوران عندیہ دیا ہے کہ اگر انتخابات کا التواء ناگزیر ہو تو التواء کا دورانیہ کم سے کم ہونا چاہئے، جبکہ پی پی پی اور مسلم لیگ (ن) نے انتخابات کے التواء کی تجویز کو مسترد کر دیا ہے ۔ پاکستان پیپلز پارٹی نے پیش کش کی ہے کہ وہ مقررہ پروگرام کے مطابق انتخابات کرانے کیلئے الیکشن کمیشن کو ہر ممکن تعاون فراہم کرنے کو تیار ہے ۔