اسلام آباد.. صدر پرویز مشرف نے پاکستان کے جوہری اثاثے القاعدہ کے ہاتھ لگنے کے تاثر کو دو ٹوک طور پر رد کرتے ہوئے کہا ہے کہ ملک میں انتہا پسندوں کے برسراقتدار آنے کا کوئی امکان نہیں ہے۔ انہوں نے یہ بات جرمن جریدے دی سپائیگل کو انٹرویو دیتے ہوئے کہی۔ جب صدر سے القاعدہ کی طرف سے ان کی حکومت گرانے اور ملک کے جوہری ہتھیاروں پر قابض ہونے کے عزائم کے بارے میں سوال کیا گیا تو انہوں نے کہا کہ ایک بات یقینی ہے انتہا پسند پاکستان میں کبھی برسراقتدار نہیں آ سکتے، صدر مشرف نے القاعدہ کو ملک کے قبائلی علاقوں میں دہشت گردی کی کارروائیاں کرنے اور خود کش بم دھماکوں کی منصوبہ بندی کرنے کا ذمہ دار ٹھہرایا، تاہم انہوں نے اس تاثر کو رد کر دیا کہ القاعدہ عسکری اور سیاسی طور پر اتنی مضبوط ہے کہ مجموعی کمان سنبھال سکتی ہے۔ انہوں نے کہا کہ وہ نہ تو عسکری طور پر مضبوط ہے کہ ہماری فوج کو شکست دے سکے ،اور نہ ہی سیاسی طور پر اتنی مستحکم ہے کہ انتخابات میں جیت سکے۔

صدر نے بین الاقوامی ایٹمی توانائی ایجنسی کے سربراہ محمد البرادی کے اس بیان کو قطعی طور پر بے جا قرار دیا، جنہوں نے ان خدشات کا اظہار کیا کہ پاکستان کے جوہری اثاثے انتہا پسندوں کے ہاتھ لگ سکتے ہیں۔ انہوں نے کہا کہ ہر چیز کا حساب رکھا جاتا ہے، دہشت گرد ایک رائفل سے بولٹ بھی باہر نہیں لے جا سکتے۔ صدر نے اس امکان کو بھی یکسر طور پر رد کر دیا کہ فوج یا آئی ایس آئی کے اندر افراد کی مذہبی انتہا پسندوں کے ساتھ کوئی ہمدردیاں ہیں جو جوہری نظام میں دخل انداز کر سکتے ہیں۔ انہوں نے کہا کہ آئی ایس آئی کسی جوہری اثاثے کو بالکل ہینڈل نہیں کرتی، ان کا اس سے کوئی واسطہ نہیں ہے۔ پاکستان کی قبائلی پٹی میں امریکہ کے خفیہ آپریشن سے متعلق سوال پر صدر نے کہا کہ میں کبھی بھی امریکی فورسز کو پاکستان کی سرزمین پر کارروائی کرنے کی اجازت نہیں دوں گا، اگر ہمیں حمایت کی ضرورت پڑتی ہے تو ہم اس کے لئے کہتے ہیں، یہ کوئی اور نہیں ہم ہیں جو کارروائی کر رہے ہیں۔

بے نظیر بھٹو کے قتل کے بارے میں صدر نے کہا کہ انہیں یقین ہے کہ جنگجو انتہا پسندوں نے انہیں مارا جیسا کہ ان کی موت پر اظہار اطمینان کرتے ہوئے بیت اللہ محسود کی آواز ریکارڈ کی گئی ہے۔ عام انتخابات میں شفاف پن کے بارے میں شبہات سے متعلق سوال کے جواب میں صدر نے کہا کہ اس ضمن میں بین الاقوامی مبصرین کو مدعو کیا گیا ہے۔ جب ان سے پوچھا گیا کہ آیا وہ نواز شریف یا آصف زرداری جیسے اپوزیشن رہنماوٴں کے ساتھ کام کرنے کے لئے تیار ہوں گے تو صدر مشرف نے کہا کہ جو بھی جیتے گا میں اس کے ساتھ کام کرنے کے لئے تیار ہوں۔ آرمی میں کمان کی تبدیلی کے بارے میں صدر مشرف نے کہا کہ اگر آرمی چیف، صدر اور وزیراعظم کے ساتھ مکمل ہم آہنگی کے ساتھ کام کرتا ہے تو تینوں ایک کی نسبت بہتر کام کر سکتے ہیں۔

ایک سوال کے جواب میں انہوں نے کہا کہ کسی ذاتی وفاداری کی نسبت ایک کاز اور وژن کے لئے وفاداری زیادہ اہم ہوتی ہے، جنرل اشفاق پرویز کیانی اور میں پاکستان، طالبان، القاعدہ، سیاست، انسانی حقوق اور ذرائع ابلاغ کے بارے میں یکساں وژن رکھتے ہیں، جب ان سے پوچھا گیا کہ آیا کسی قسم کے حالات ان کے استعفیٰ کا باعث بن سکتے ہیں، تو صدر نے کہا کہ مجھ پر یقین کریں جس دن میں نے یہ سمجھا کہ عوام، ان کی اکثریت مجھے مزید نہیں چاہتی اور جس دن میں نے یہ سمجھا کہ میرا اس ملک کے لئے کوئی کردار نہیں ہے تو میں ایک لمحے کے لئے بھی انتظار نہیں کروں گا، اوراقتدار چھوڑ دوں گا۔