ہالی ووڈ کے ایک پروڈیوسر نے انٹرنیٹ کے ذریعے فلم بنانے والوں کی نئی نسل کی تلاش شروع کی ہے۔
دیپک نائر نے سابقہ فاکس نیٹ ورک کی سینڈی گروشو کے ساتھ مل کر’فلماکا‘ نامی انٹرنیٹ ویب سائٹ کا اجراء کیا ہے۔

اس ویب سائٹ پر انہوں نے ابھرتے ہوئے ڈائریکٹرز کو مدعو کیا ہے کہ وہ اپنی فلم کا ایک کلپ بھیجیں اور ان میں سے ایک کو فیچر فلم کو بنانے میں مالی امداد کی جائےگی۔

ان فلم کلپوں کا فیصلہ کرنے کے لیے ججوں میں فلم ایکٹر کالن فرتھ اور ڈائریکٹر ورنر ہرزوگ، وم وینڈرز اور پال شریڈر شامل ہیں۔ دیگر ججوں میں نیل لابیوٹ اور بل پلمین شامل ہیں۔

ابھی تک ’فلماکا‘ کو پچانوے ممالک سے تین ہزار چھ سو فلم بنانے والوں نے اپنی فلم کلپ بھیجے ہیں۔ کامیاب ہونے والے کے نام کا اعلان اٹھائیس اپریل کو کیا جائے گا۔

’فلماکا‘ نے یہ ویب سائٹ ایک سال کے عرصے میں تیار کی ہے اور اس بارے میں نیئر نے کہا ہے کہ ’ہم انٹرٹینمنٹ کے شعبے میں آنے اور کیرئر بنانے والے لوگوں کی حوصلہ افزائی کر رہے ہیں‘۔

__________________