انڈین پریمیئرلیگ: کھلاڑیوں کی تیاریاں مکمل ، شائقین میں زبردست جوش و خروش
کراچی (جنگ نیوز)انڈین پریمیئر لیگ (آئی پی ایل)کے سنسنی خیز میچوں کے آغاز کی تاریخ جوں جوں قریب آرہی ہے، شائقین کرکٹ کا جوش و خروش عروج پر پہنچتا جارہا ہے ، دوسری جانب ٹورنامنٹ میں شریک تمام ٹیموں نے بھی کروڑوں روپے مالیت کی اس چیمپیئن شپ میں فتح یاب ہونے کے لیے بھرپور تیاریاں کرلی ہیں اور جمعہ18اپریل سے آئی پی ایل کا میدان سج جائے گا، جب پہلا میچ کھیلا جائے گا۔جیو سوپرٹوئنٹی ٹوئنٹی فارمیٹ کے تحت کھیلی جانے والی انڈین پریمیئر لیگ (آئی پی ایل ) کے تمام میچز اپنے ناظرین خاص طور پر شائقین کرکٹ کے لیے براہ راست نشر کرے گاتاکہ کرکٹ کے دیوانے8ٹیموں کے درمیان 59مقابلوں سے بھرپور انداز میں لطف اندوز ہوسکیں۔پاکستانی کرکٹ ٹیم کے کپتان شعیب ملک،عالمی شہرت یافتہ آل راؤنڈر شاہد آفریدی،وکٹ کیپر بیٹسمین کامران اکمل، فاسٹ بولرسہیل تنویر، محمد آصف، عمر گل،باصلاحیت بلے باز محمد حفیظ ،سلمان بٹ، یونس خان اور مصباح الحق بھی مختلف ٹیموں میں شامل ہیں۔دنیائے کرکٹ کے شہرہ آفاق ستاروں سے سجی انڈین پریمیئر لیگ (آئی پی ایل)انڈین کرکٹ لیگ (آئی سی ایل) کے مقابلے میں اس لیے اہمیت کی حامل ہے کیونکہ اسے آئی سی سی کی بھی منظوری حاصل ہے۔دکن چارجرزکو امید ہے کہ دنیا کے ہر میدان میں چوکوں اور چھکوں کی برسات کرنے والے شاہد آفریدی اس ٹورنامنٹ میں ان کے لیے بھی رنز کا انبار لگائیں گے، دوسری جانب دہلی ڈیئرڈیولز کی ٹیم بیٹنگ کے شعبے میں شعیب ملک اور فاسٹ بولنگ کے میدان میں محمد آصف کی صلاحیتوں سے بھرپور فائدہ اٹھانے کی خواہا ں ہے۔کولکتہ نائٹ رائیڈرزمیں محمد حفیظ، عمر گل اور سلمان بٹ شامل ہیں جو کسی بھی وقت مخالف ٹیم کو حیران کرسکتے ہیں، کولکتہ نائٹ رائیڈرز میں اسپیڈاسٹار اور راولپنڈی ایکسپریس کے نام سے مشہور شعیب اختر بھی شامل تھے تاہم پاکستان کرکٹ بورڈ (پی سی بی) کی جانب سے پابندی کے بعد آئی پی ایل کے منتظمین نے انہیں کھلانے سے معذرت کرلی ہے۔راجستھان رائلز پاکستانی کرکٹ ٹیم کے سابق کپتان یونس خان، کامران اکمل اورسہیل تنویر سے شاندار کارکردگی کی توقع رکھے ہوئے ہے جبکہ بنگلور رائل چیلنجرز میں اسٹائلش بلے باز مصباح الحق کی شمولیت پوری ٹیم کے لیے باعث اطمینان ہے۔پاکستانی کھلاڑیوں کے علاوہ دنیائے کرکٹ کے متعدد مشہور و معروف کھلاڑی آئی پی ایل میں شرکت کررہے ہیں جن کی شمولیت نے ٹورنامنٹ کو ہر ایک کیلئے بہت دلچسپ بنادیا ہے ، اس کے علاوہ شو بز شخصیات اور بڑے صنعتکاروں کی جانب سے مختلف ٹیموں کو اپنانے کی وجہ سے بھی دنیا بھر کی توجہ اس ٹورنامنٹ پر مبذول ہوگئی ہے۔ بالی ووڈ کے کنگخان شاہ رخ خان کی ٹیم کولکتہ نائٹ رائیڈرز ہے،اس کے علاوہ پریتی زنٹا اور دیگر شخصیات بھی ایونٹ میں گہری دلچسپی دکھارہے ہیں۔

__________________